Аеродромци против монтажниот паркинг

Граѓаните го спречија почетокот на изградбата на новото паркиралиште

Првиот монтажен паркинг во општината Аеродром може да не доживее реализација. На вчерашното фрлање лопата, градоначалникот Ивица Коневски го дочекаа револтирани жители на зградите спроти „Мекдоналдс“, на чиј паркинг требаше да се гради првата монтажна катна гаража во општината. Граѓаните се против изградбата, бидејќи, како што велат, воопшто не биле консултирани дали се согласуваат со тоа. Тие бараат заштита на зе��ениот појас пред зградата и воведување зонско паркирање на паркингот, бидејќи реален проблем со бројот на возилата на паркингот нема.

Дефинитивната одлука дали ќе се гради монтажниот паркинг ќе биде донесена дополнително на состанок со градоначалникот Коневски и со претседателите на сите куќни совети од околните згради.

„Проблем со паркирањето немаше додека не се направи зонското паркирање кај ’Бисер‘. Сите возачи што не сакаат да плаќаат, сега паркираат на нашиот паркинг. Поради тоа, бараме зонско паркирање и тука, па ќе нема потреба од монтажен паркинг“, велат граѓаните.

За градоначалникот Коневски проблемот со бројот на паркинг-места нема да се реши само со зонското паркирање, но, сепак, вели дека ќе постапи според желбата на мнозинството граѓани. Зонско паркирање ќе биде воведено до крајот на октомври, а во „Градски паркинг“ веќе се изработува проект.

Монтажната катна гаража треба да обезбеди дополнителни 40-ина паркинг- места. Паркиралиштето треба да се гради од челична конструкција со платформа и со пристапни рампи. Инвестицијата ќе ја чини Општина Аеродром 17 милиони денари.

„Постојат повеќе локации во општината каде што има потреба од дополнителни паркинг-места, кои планираме да ги решаваме на ваков начин. Освен на овој паркинг, можно е монтажни катни гаражи да се градат и зад ’Бисер‘ и во Ново Лисиче“, најави вчера Коневски. (С.Н.)