Опозицијата го напушти Собранието

СДСМ, НСДП, ЛП и НА не гледаат смисла за натамошно учество во парламентот

Билјана Јовановска

Собранието останува без опозиција. СДСМ, НСДП, ЛП и НА го напуштија парламентот, а ЛДП и Нова демократија деновиве ќе одлучат што ќе прават. ДПА веќе една и пол година не е во Собранието, така што практично една четвртина од вкупниот број пратеници се на улица.

Одлуката на социјалдемократите за неучество во работата на законодавниот дом вчера прв ја соопшти лидерот Бранко Црвенковски, а веднаш потоа со ист став излегоа и трите други опозициски партии.

Веќе е речиси извесно и излегувањето на пратениците од Нова демократија, но, иако за напуштање на пратеничките клупи размислувале подолго време, одлуката ќе ј�� официјализираат викендов. Според тоа, засега од опозициските партии таму ќе остане единствено ЛДП. До кога - не се знае, но и нивните партиски органи ќе ја разгледаат новонастанатата состојба и ќе заземат став што и како натаму. Со ова на повидок е сериозна политичка криза, иако, гледано само низ бројки, актуелната владејачка гарнитура и натаму го има парламентарното мнозинство.

СДСМ, како што рече Црвенковски, нема да учествува во работата на Собранието, бидејќи „немаат намера да и' даваат легитимитет на оваа недемократска и ненародна власт“. Соопштувајќи ја оваа одлука Црвенковски нагласи дека тој лично никогаш не поддржувал бојкот на институции, секогаш верувал дека во една парламентарна демократија тоа не е вистински начин на водење политичка битка. „Но, во Македонија, со оваа власт, одамна нема демократија. Ете му го на Груевски парламентот таков каков што отсекогаш го посакуваше - без опозиција. Ете му ги Сител и Канал 5, ете му го друштвото на партиски послушници и платеници. СДСМ од денес оди на другата, вистинската и, бидете сигурни, победничката страна од барикадата -со народот и меѓу народот! Македонија под власта на Груевски, дефинитивно, не е ниту слободна ниту демократска држава. Овој режим има опасни намери во однос на нашата земја. Или ќе го запреме или ќе станеме негови соучесници“, порача шефот на опозициската СДСМ.

За пратеничката група на НСДП, ЛП и НА затворањето на телевизијата А1 и на дневните весници „Време“, „Шпиц“ и „Коха е ре“ е јасен сигнал дека во Македонија се воведува диктатура. Со затворањето медиуми и ставањето на информативниот простор во државата под директна контрола на власта, во Македонија, дефинитивно, умира демократијата.

И Црвенковски потенцираше дека во Македонија на сцена е еден недемократски, авторитарен, ненароден режим. Ги обвини „премиерот Груевски и фамилијата дека по економската пустош и социјалната беда, по меѓународната изолација и уривањето на сите демократски норми и стандарди, сосема свесно и крајно неодговорно ја внесуваат земјата во тешка политичка криза со несогледливи последици. Нивна цел се постојани поделби, меѓусебни конфронтации, тензии и судири во македонското општество. Дискредитираат, сеат омраза меѓу луѓето, прават црни списоци секој ден и во сите сфери“.

Лидерот на СДСМ потсети на поделбите и на конфронтациите што се случија само во последните два месеца: медиуми со медиуми, новинари со новинари, административци со тутунари, пациенти со лекари, студенти со професори. Според Црвенковски, „никогаш во нашата историја, не само во независна Македонија или во поранешна Југославија, туку и под туѓи владеења македонскиот народ не бил вака поделен и скаран меѓу себе. Тоа што не им успеа на странските поробувачи му успеа на Никола Груевски“.

Тој го повтори ставот дека ако Велија Рамковски го прекршил законот треба да одговара, но праша: „Кој и со што ги спречува да го докажат и да расчистат со наводниот криминал? Обвинителот и истражниот судија, кои го водат случајот, сами ги избраа. Обвинетите се во притвор повеќе од еден месец. Целата документација од фирмите е во нивни раце. Сведоците редовно се одѕиваат на поканите и сведочат пред судот. Зошто и по толку време не ја завршат истрагата и не ја поведат постапката пред судот? Зошто блокада на сметките на А1, на ’Шпиц‘, ’Време‘ и ’Коха е ре‘?“

Црвенковски рече дека Груевски не е заинтересиран ниту да открива ниту да се бори против криминал. „Тој е единствено заинтересиран да го скрие сопствениот криминал и последиците од своето погубно владеење. Груевски сака да ја снема, да ја закопа вистината. Да настане целосен мрак, целосен молк и да остане сам со своите лаги и медиумски мегафони“, рече шефот на СДСМ.