Претходен број

ИРИ: Растечки песимизам за економските текови

Потребен е моќен економски план за кризата: Линдзи Лојд

Премиерот смета дека Владата со превентивните мерки спасила многу фирми од банкрот

Соња Маџовска

Македонските граѓани најмногу стравуваат од економска криза, покажува последното истражување на јавното мислење во Македонија, направено од Меѓународниот републикански институт. Во последните шест месеци, дури две третини од граѓаните повеќе стравуваат за економската состојба во 2009 година споредено со истиот период лани поради можноста Македонија да биде посилно погодена од светската криза.

„Има растечки песимизам за економските текови, а тоа претставува дополнителен поттик за Владата да излезе со моќен економски план во кој ќе има отворање нови работни места и намалување на невработеноста“, изјави Линдзи Лојд, регионален директор за Европа при Меѓународниот републикански институт.

Тоа дека е потребен нов економски план со сет од мерки за ублажување на последиците од кризата се' погласни се и домашните бизнисмени. Бараат полесен пристап до кредити, предност на тендерите, намалување на дел од давачките спрема државата. Бизнисот стравува од намалување на производството, со оглед на тоа што се соочуваат со откажување на порачките, што неминовно ќе доведе до уште поголемо намалување на бројот на вработени.

Иако бизнисмените од најпогодените гранки - металургијата, текстилот и градежништвото порачаа дека само две од пакетот од десет мерки што ги предложи Владата на крајот од минатата година се ефективни, за премиерот Никола Груевски тие даваат добри резултати. Тој вчера истакна дека земјава влегува во групата земји кои меѓу првите реагирале со превентивни мерки со што, како што рече, многу фирми преживеале и се спасиле од банкрот.

„Внимателно ја следиме состојбата. Првичните мерки што ги презема Владата даваат добри резултати. Се разбира, откако ќе помине еден период и ќе ги видиме комплетно резултатите од првите мерки, можеби ќе одиме и на нареден пакет. Размислуваме околу тоа, ќе видиме дали има потреба или нема, ќе видиме што се презем�� во другите држави. Следиме што се случува во светската економија и анализираме какви последици може да има врз домашната економија“, порача вчера премиерот Груевски. Тој најави нови средби со стопанствениците и претставниците на стопанските комори и со компаниите во земјава.