Власта и опозицијата си играат „во тебе е шугата“

Песочниот часовник истекува, а власта и опозиц��јата го трошат времето и политичката енергија во препукувања. И вчера продолжија меѓусебните префрлањата околу тоа кој и како треба да го реши проблемот со името, што е главната пречка за македонските евроинтеграции.

ВМРО-ДПМНЕ вчера на прес-конференција го повика лидерот на СДСМ, Бранко Црвенковски, да одговори што планира да направи за решавање на спорот за името и дали тоа ќе биде по цена на идентитетот и менување на Уставот. Шефот на левичарската опозциска партија, пак, возврати во негов стил: „Владејте или одете“ и додаде дека ќе каже како ќе го реши спорот, но дури откако Груевски ќе го признае поразот.

Владимир Ѓорчев, член на Извршниот комитет на ВМРО-ДПМНЕ, потсетувајќи, како што вели, на нереализираните ветувања на Црвенковски за вработување по еден член од секое семејство, за укинување на визите и за решавање на проблемите на стечајците, сега ветува влегување на Македонија во ЕУ и во НАТО, иако тој имал шанса да го направи тоа.

„На крајот би сакале да ги прашаме СДСМ и Бранко Црвенковски што планираат со името на државата, идентитетот на македонскиот народ? Дали Црвенковски договорил нешто и ако договорил што договорил? Дали нешто договара моментално и презема обврски и какви обврски презема? И дали има намера и која е неговата намера во иднина во врска со името и со идентитетот на Македонија? Одговорот на овие прашања им го должи Бранко Црвенковски на македонските граѓани, затоа што многупати во минатото сме виделе дека Црвенковски презема обврски што се на штета на Македонија и на македонските граѓани, а потоа бездушно ги исполнува“, рече Ѓорчев.

Лидерот на СДСМ, Бранко Црвенковски, пак, на прес-конференција изјави дека ќе одговори на прашањата на премиерот Никола Груевски во врска со решавањето на спорот за името доколку тој јавно ја преземе одговорноста за тоа што ЕУ се' уште не одреди датум за почеток на преговорите со Македонија и оти не може да ја внесе државата во НАТО и во ЕУ.

„Владејте или одете! Владеење значи решавање на проблемите на овој народ и на оваа држава, значи да се соочите и да ја преземете одговорноста за сопствените неуспеси, а не постојано да барате дежурни виновници. За да имате право да не' прашувате како би ги решавале проблемите, ќе мора прво јавно да ја преземете одговорноста за поразот во Брисел и јавно да соопштите дека не можете да ја внесете Македонија во НАТО и во ЕУ. Тогаш ќе добиете одговор на вашите прашања“, изјави Црвенковски на прес-конференција.

Тој рече дека партијата ги има одговорите, како и тогаш, како што наведе, кога „обезбеди кандидатски статус за членство во ЕУ и кога ја доведе пред вратата на НАТО, без кој било да го постави прашањето, а не да го загрозува македонскиот национален идентитет“.

Одговарајќи на новинарско прашање, Црвенковски рече дека посакува да има макар тајни преговори за спорот со името.

„Ако ги има, тогаш има и шанси да се дојде до решение. Се плашам дека се' се сведува на фотосесии, поздравувања и сликање без каква било суштина и содржина на тие средби“, изјави претседателот на СДСМ. (П.Р.)