Премиерот остана сам на отчетот

Политичките партии и експертите оценуваат дека кавгата со ДУИ е доказ дека нешто многу чкрипи во владината коалиција

Светлана Унковска


Соло-настапот на премиерот Никола Груевски на прес-конференција посветена на активностите на Владата беше соломонското решение по најновиот конфликт меѓу коалициските партнери ВМРО-ДПМНЕ и ДУИ. Кога во владината сала за прес-конференции Груевски се појави сам, беше очигледно дека владините партнери не успеаја да се договорат дали содржината на говорот на премиерот треба да го опфати четиригодишниот мандат од неговото владеење или двегодишното на актуелната власт.

ДУИ, покрај сите премолчувања и компромиси што ги правеше во изминатото двегодишно искуство со својот партнер ВМРО-ДПМНЕ, овој пат, сепак, реши цврсто да застане на својата одлука. Вицепремиерот Абдулаќим Адеми му рече „не“ на својот шеф, премиерот Груевски. Горкото искуство го носат од минатата година кога интегративците останаа затечени од настапот на премиерот, кој во отчетот говореше само за проектите и остварувањата на ВМРО-ДПМНЕ.

За скандалот да не биде многу голем кога меѓу свитата на премиерот немаше да се појават и министрите на ДУИ, Груевски вчера мораше до владината говорница да дојде сам. Неговата перцепција дека власта е во рацете на ВМРО-ДПМНЕ, а попатно имаат коалициони партнери не му дозволи да го прифати барањето на ДУИ, испорачано во вид на ултиматум - или отчет за двете заеднички години или нивните министри не излегуваат на прес-конференцијата.

Политичките партии и експертите оценуваат дека со говорот Груевски покажал дека е опиен од власта, додека несогласувањата со ДУИ биле доказ дека нешто многу чкрипи во владината коалиција. ДУИ одби да го коментира пресот, поради, како што рекоа „она што го имавме го кажавме претходно“.

„Денешната прес-конференција на Груевски е само уште една потврда дека човекот е опиен од власта и целосно го изгубил чувството на реалност. Господине Груевски, тврдите дека работите деноноќно. Ако резултат на вашето работење е оваа осиромашена, изолирана држава во која владее криминал и корупција, тогаш ве молиме да не работите толку“, рече потпретседателот на СДСМ, Зоран Заев. Случувањата меѓу владините партнери, според него, се резултат на нивната заемна недоверба.

„И самите веќе не си веруваат. Мислам дека многу јасно им станува на сите дека се работи за Влада и за премиер во заминување“, оцени Заев.

Од НСДП велат дека во говорот на премиерот не покажува визија за излез на земјава од кризата и дека поради тоа уште повеќе ги исплаши граѓаните.

„Крајно нереален говор што имаше, пред се', предизборна и популистичка функција. Најстрашно е што не покажа никаква визија како да излеземе од оваа тешка ситуација и со тоа тој ги исплаши граѓаните. Она што е, исто така, обесхрабрувачки е тоа што рече дека Владата нема намера да поведува никакви иницијативи за НАТО и ЕУ“, истакна Тито Петковски, кој и самиот беше дел од првиот двегодишен мандат на Владата на Никола Груевски.

Опозициската Нова демократија смета дека Груевски уште еднаш ги потврди нивните тези дека ДУИ гласала се' што и' било сервирано од ВМРО-ДПМНЕ.

„Јавно ја прашуваме ДУИ дали се согласува со ваквиот отчет на премиерот Груевски и дали мисли дека на овој начин им придонесува на интересите на Албанците и на мултиетничката држава“, со соопштение реагираа од Нова демократија.

Политичкиот аналитичар Алберт Муслиу смета дека последната кавга на владините партнери укажува дека наскоро ќе има предвремени избори. „Со ваквите однесувања на владините партнери, релативно е сигурно дека ќе се влезе во циклус на предвремени избори и затоа многу не се осврнуваат на чувствата на другиот партнер. На површина излегуваат несогласувањата и нетрпеливоста, која ја следеа оваа коалиција уште од првиот ден. Не гледам и не верувам дека овој говор е подготовка за подготовка на јавноста за евентуално решение на спорот со името и деблокирање на евроинтеграциските односи, туку чист вовед во предвремени избори“, убеден е Муслиу.