Поглед

Идеален партнер

Маја Томиќ

Добро е. Треба вистински да не' радува што Македонците, кои тргнале по европскиот пат во секоја смисла, се' уште се држат до патоказот на традицијата, кога станува збор за семејството. Знаат што е она вистинското во заедничкиот живот со партнерот. Не ги ставаат моќта и парите на прво место, туку иста важност им даваат на децата и на семејството.

Така покажуваат податоците од анкетата на агенцијата ГФК. Запрашани каков го замислуваат идеалниот партнер, и мажите и жените, дале речиси исти одговори: тој (таа) треба да работи, но не на многу значајни позиции, и наедно да се грижи за децата и за семејството, доколку ги има. Не бабите и на дедовците или некои други лица, туку родителите заеднички да ги делат обврските. Значи, секому му е значајна работата, без пари нема егзистенција, но еднакво му е битно и семејството. Во потрадиционалните средини во државава, каде што најголем процент од жените се невработени домаќинки, над 50 отсто од граѓаните сметаат дека најидеалниот партнер е оној што му се посветува, пред се', на децата и на фамилијата.

Постои ли опасност наскоро да се скршат овие традиционални рамки? Иако 40 отсто од анкетираните се' уште ги ценат старите вредности на семејството, сепак, демне таа опасност. Состојбите би можеле да се сменат за десетина години, ако не и порано. Бидејќи, денес помладите на возраст од 19 до 24 години не мислат така. Триесет и три о��сто од оваа група одговориле дека најважно за нив е ако партнерот има работа и гради кариера, а доколку има семејство и деца, за нив да се грижи некој друг член од фамилијата. Младите фантазираат за кариеризам, ќе речат социолозите, не ги знаат вистинските вредности на животот што се осознаваат подоцна. Само останува прашањето дали со текот на годините ќе созреат и ќе го сменат првичниот став.