Претходен број

Експертите контра Бесими - кризата нема да ни донесе инвестиции

Не мислам дека кога на сите им е многу лошо, нам ќе ни биде многу добро, вели професорот Узунов

Александар Пешев

Можно ли е Македонија да профитира во услови на светска финансиска криза? Потврден одговор на оваа теза даде министерот за економија, Фатмир Бесими, кој во изјава за медиумите изрази надеж дека Македонија ќе привлече повеќе инвестиции во тековните кризни услови на светските пазари.

„Македонија може да има корист од влијанието на светската финансиска криза, бидејќи големите компании можат да ги пренасочат своите бизниси на пазари како што е македонскиот“, изјави Бесими.

Експертите не се согласуваат со ваквите очекувања. Според професорот на Правниот Факултет, Ванчо Узунов, во светот се намалуваат инвестициите и нереално е да се очекува дека странците повеќе ќе инвестираат во Македонија.

„Јас не мислам дека кога на сите им е многу лошо, нам ќе ни биде многу добро. Кризата се' уште силно не ја погоди земјава, но се сомневам дека тоа така и ќе остане“, вели Узунов.

Странски експерти тврдат дека тезата „парите мора да одат некаде - зошто да не одат во земјите во развој“ е само теоретска формулација која досега се нема остварено во практиката.

Д-р Ханс Јаекел, шеф на Одделот за економија и потпретседател на германска ДЗ банк, вели дека таквите очекувања се нереални.

„Тоа не оди така. Инвестициите се сметаат за несигурни насекаде. Теоретски може да се очекува еднаква дистрибуција на капиталот во светската економија, но во практика тоа не се случило во изминативе 20 години. Сметам дека тоа нема да се случи во земјите во развој, посебно не во земјите на Југоисточна Европа“, објаснува Јаекел , додавајќи дека доколку ваквиот модел би бил остварлив во практика, прва земја во која би се слевало повеќе капитал би била Кина.

Инаку, во Кина досега банкротираа 70.000 компании, а темпото на банкротирање е за двапати зголемено во споредба со минатата година.

Додека македонските власти се надеваат на приливи од странство, одбивајќи да ги обелоденат конкретните мерки кои би ги презеле при евентуален шок од странство, кризата беснее на странските пазари.

„Ситигруп“ неделава опушти 50.000 вработени со цел да ги намали расходите од работењето за 10 милијарди американски долари.

Автомобилскиот гигант „Форд“ ќе го продава својот 20-процентен удел од „Мазда“ со цел да заработи 540 милиони американски долари. Најголемиот производител на челик во Русија ја замрзна работната програма со која планираше да потроши околу 8 милијарди американски долари.

Прогнозите за стабилизација на пазарите не се оптимистички.

„Најдоброто сценарио беше дека состојбата нема да се влошува, туку дека по малку ќе закрепнува со текот на времето. Контролорите ја одбија оваа теза како претерано оптимистичка“ вели Ханс Јаекел од ДЗ банк.

Германија, Италија, Јапонија и Америка веќе официјално се во рецесија. Бугарските политички партии предупредуваат дека кризата ќе затвори од 40.000 до 50.000 работни места во земјата во текот на идната година.

Експертите и владините претставници тврдат дека засега нема директни ефекти од светската криза во земјава. Од банкарскиот сектор велат дека пристапот кон кредити нема да биде многу лесен со воведувањето на построги критериуми за кредитирање.