„Ситигруп“ најави уште 50.000 отпуштања
Компанијата „Ситигруп“, која има најголема светска мрежа за давање финансиски услуги, вчера соопшти дека планира во наредните месеци да отпушти уште 50.000 вработени во обид да ги намали трошоците за персонал за околу 20 отсто. Бројот на вработените во компанијата кон крајот на септември ќе се намали од 352.000 на околу 300.000, објасни управата на банката пред акционерите. Агенцијата „Кјодо“ потсетува дека „Ситигруп“ веќе укина 23.000 работни места од почетокот на годината. Во периодот јуни-септември „Ситигруп“ прокнижи нето-загуба од 2,8 милијарди долари, забележувајќи негативно салдо четири квартали по ред. Вредноста на акциите на компанијата падна на дури 70 отсто од почетокот на годината.
Програмата за намалување на трошоците вклучува и продажба на ризични акции, главно поврзани со кризата на хипотекарниот пазар, и намалување на вкупните трошоци за една петтина.
Исто така, големите светски банки вчера објавија дека се погодени од економската криза, така што британската банка Барклис се откажа од бонусот, додека профитот на најголемата јапонска банка Мицубиши УФЈ изгуби 64 проценти. Банката Барклис, соочена со гневот на акционерите поради одлуката да земе 5,8 милијарди фунти од блискоисточните инвеститори, соопшти дека ја стопира исплатата на бонусот за раководството откако тоа го направија и американската и швајцарската банка Голдман Сакс и УБС. Најголемата јапонска банка, финансиската групација Мицубиши, објави дека во првата половина од годината загубила 64 отсто од профитот, додека австралиската банка Меквери груп соопшти дека првпат во 17 години бележи пад на профитот. Банката ХСБЦ најави намалување на бројот на вработените и укинување на уште 500 работни места во Азија. (Ек.Р.) |
