Иванов отвори народна канцеларија во Тетово

„Ги уверувам граѓаните дека нивниот глас ќе се слуша и од претседателот, а нивните барања ќе најдат институционална разврска“, истакна Иванов

ТЕТОВО - За да се доближи до граѓаните, да ги слушне нивните мислења, предлози, идеи, па и лични проблеми, претседателот Ѓорге Иванов вчера отвори народна канцеларија во Тетово. Ова е прва канцеларија во внатрешноста на државата по онаа што е отворена лани во април во Скопје.

„Моја желба и обврска е лично да се запознаам со се' што сакаат граѓаните да кажат, да предложат и, едноставно, да се пожалат. Тие можат да предлагаат иницијативи, да даваат идеи. Досега до Одделението за претставки и предлози на Кабинетот на претседателот најмногу поплаки има од областа на судството и социјалната политика“, истакна Ѓорге Иванов на отворањето на канцеларијата во Тетово. Иванов смета дека и канцеларијата во Тетово ќе биде во функција на пренесување на мислењата на луѓето за вкупните состојби во општеството.

„Ги уверуваме граѓаните дека нивниот глас ќе се слуша и од претседателот. Нивните барања ќе најдат институционална разврска. Преку оваа канцеларија ќе се остваруваат комуникации и со локалната и со централната власт. Барањата што не се однесуваат на претседателот ќе ги доставуваме до надлежните и ќе бараме нивно адекватно разгледување и разрешување, а граѓанинот повратно ќе го информираме“, истакна Иванов.

До есен е предвидено ваква канцеларија да профункционира и во Битола. Се смета дека ќе има потреба од народни канцеларии во уште неколку поголеми градови во државава. (Г.Е.)