Снимка за Црвенковски, филм за Груевски

ВМРО-ДПМНЕ вчера ја достави до Кабинетот на поранешниот претседател, Бранко Црвенковски, снимката од дебатата за случајот „Надеж“, во која професорката Ана Павловска-Данева, член на раководството на СДСМ, го споменува словенечкиот премиер Борут Пахор. Од СДСМ возвратија со „подарок“ за премиерот Никола Груевски - филмот „Големиот диктатор“ со Чарли Чаплин. „Верувам дека премиерот Груевски ќе го гледа филмот со особено внимание“, забележа опозицискиот портпарол Емилијан Станковиќ.

Портпаролот на ВМРО-ДПМНЕ, Александар Бичик��иски, кој ја достави снимката кај Црвенковски, пак, посочи дека Данева прва го спомнала словенечкиот премиер. „Ниту еден медиум ниту една друга политичка партија не го спомна господинот Пахор пред тоа да го направи вашиот претседател на Централниот одбор. Господине Црвенковски, ако навистина стоите зад извинувањето упатено до Пахор и ако навистина ви значат добрите односи меѓу двете држави, треба да се оградите од нејзината изјава, да ја разрешите или да побарате нејзина оставка“, рече Бичиклиски.

Станковиќ одговори дека настапот на Данева бил одличен и во целосна координација со ставовите на СДСМ. „Жално е што Груевски и ВМРО-ДПМНЕ наместо да ги решаваат проблемите на граѓаните, за што се платени со народни пари, се занимаваат со организирање пародии“, рече Станковиќ. (П.Р.)