Се подготвува сеча на амбасадори

По смените на министрите, ќе се враќаат и амбасадорите што се покажале како „празни величини и лажни авторитети“

Слободанка Јовановска

По министерските „ќе летаат„ и амбасадорски глави.Ова го потврдија официјални извори, откако во интервју деновиве претседателот Ѓорѓи Иванов истури еден куп критики на адреса на македонската дипломатија, нарекувајќи некои од нејзините протагонисти „лажни авторитети и празни величини„.

Како што се дознава, есенва ќе се направи уште едно оценување на работата на амбасадорите и, во зависност од наодите, ќе се знае кој ќе биде вратен во земјата, при што во моментов барем тројца од нив веќе се на неформалниот список за смена од функцијата. Кои - никој не сака да каже, но смената веќе најтранспарент��о се најавува во јавноста со образложение дека некои од нив воопшто не праќале белешки и не била видлива нивната работа.

И покрај тенденцијата оваа најава да се објасни како техничка, тешко е да се избега од впечатокот дека промената е политичка и тектонска и дека на списокот ќе се најдат оние кои беа „продолжеток“ на политиката по која се распознаваа Антонио Милошоски, Васко Наумовски и Мартин Протоѓер.Што забележа всушност шефот на државата и што е тоа што се смени преку ноќ за да одеднаш сите дигаат раце од политиката зад која стоеја до вчера?

Според Иванов, воочливо било дека соговорниците со кои тој се среќавал ги знаеле грчките, но не и македонските ставови и дека две години морал да се бори со перцепцијата создадена за спорот од Грција, иако таа не соодветствува на реалноста.Дека дипломатите биле преплашени, па и во илегала, и место да зборуваат оставале други да зборуваат место нив, оставајќи празнина во работата. Дека треба да престанат да плачат и да се жалат (нешто што му се прикачуваше како опис на екс шефот на дипломатијата Антонио Милошоски) туку да бидат добро информирани, проакативни, кредибилни и офанзивни.

Напад со ваква жестина врз МНР, откако со месеци се тврдеше дека како никогаш досега надворешната политика не била толку усогласена меѓу институциите што се инволвирани, не е виден досега и не може да биде случаен. Ако не е внатрешна пресметка со Милошоски и со кадрите околу него, тогаш може да биде само најава за нов курс.

Дипломати, кои сакаа да бидат анонимни, посочуваат пред се на тајмингот на оваа најава, но пораката не ја гледаат толку на адреса на стариот министер Милошоски колку на новиот Никола Попоски, во смисла што треба да прави и кај да се движи во иднина. За сите клучно е дека главниот играч во надворешната политика (премиерот) не се менува, а мотивот го гледаат во влошената позиција на Македонија надвор и во фактот дека, освен силни патриотски изјави, нема резултати ниту, пак, идеи за решенија.

„Претседателот е во право кога дава вакви оценки за дипломатијата. Но, ме изненади жестокоста и моментот на ваквите критики. Македонија дојде до ѕид и нема веќе простор за тактизирање. Едно беше до Букурешт, а друго е сега.До Букурешт можевме да тактизираме, но потоа моравме да бараме решенија. Целиот систем на МНР не функционираше како што треба. Дипломатите се сепак извршители и мора да имаат информации и инструкции од дома“, оцени еден од нив, додавајќи дека навистина е неприфатливо дури и Дорис Пак да не ги знае информациите и ставовите на Македонија.

И на средбата со новиот шеф на дипломатијата претседателот Иванов побара да се зголеми ефикасноста на МНР и квалитетот на неговата работа. Самиот Попоски најави нешто што навестува смени, што практично значи дека чистката продолжува и дека за првпат претседателот и владата на ВМРО-ДПМНЕ ќе си враќаат свои амбасадори, а не наследените од СДСМ, бидејќи тие што беа тоа добија поддршка од Груевски.

Дали ќе бидат на удар оние што не беа доволно агресивни во реториката против Грција (како што вели Иванов, што не смееле јасно и гласно да го изговорат името на Македонија) или, пак, на удар ќе се најдат амбасадорите „првоборци“ од профилот на Мартин Треневски во НАТО или Благој Ханџиски во Атина и сега Софија? Ако се следи логиката на смените досега, агресивниот патриотизам и кавгите со меѓународната заедница веќе не се на цена.

И екс советникот на претседателот, Ристо Никовски, во својот блог деновиве, оцени дека на САД им се брза за решение околу името, но Македонија самата многу задоцнила.

„Веќе предолго не се влечат потези соодветни на ситуацијата. Кој е нашиот одговор на ставот дека без решение за името нема НАТО и ЕУ? Демонстриравме одлучност дека нема да се откажеме од тоа што сме, ама тоа не е доволно. Потребна е наша иницијатива. Вашингтон треба официјално да знае што можеме да прифатиме. На која основа го гледаме решението. Изјавата на Клинтон покажува дека не сме го постигнале тоа„, напиша Никовски.

Со резолуција во Конгресот со име БЈРМ туркана не од било кој туку од претседавачката на Комитетот за надворешни работи, со закани за повлекување на препораката за преговори од ЕУ и со изјави од САД кои се повеќе одат на линија на грчките ставови - не е ни чудно што се најавуваат вакви потези.