Коњановски повторно во нова улога

Ротацијата од прв човек во одбраната на втората позиција во земјоделство е едно од изненадувањата во новата Влада

Светлана Унковска

Нецела недела откако беше именуван на нова функција, поранешниот министер за одбрана, Зоран Коњановски, веднаш се зафати со проблемите во земјоделството. На 2 август, денот кога Македонија ги одбележа двата Илиндена, прва задача на новиот заменик-министер за земјоделство беше да го посети Прилеп за да ги увиди штетите од невремето што го зафати претходниот ден тој крај. На прилепчани им порача дека очекува во најскоро време да дојдат комисии на терен и да ги проценат штетите во земјоделството за да подготват извештај што ќе бил ставен на разгледување на владина седница.

„Општина Прилеп треба да излезе на терен и со комисии да се увиди штетата во земјоделството. Одиме во селото Селце каде што има посеви на тутун за да ги увидиме штетите“, рече тој во својата прва изјава како заменик- министер. Коњановски вчера, заедно со министерот за земјоделство, Љупчо Димов, беше во битолското село Новаци на средба со производителите на пченица.

И се' ќе беше вообичаено да не го гледавме неодамна Коњановски како од позиција на министер за одбрана се среќава во Брисел со првиот човек на НАТО, Андерс Фог Расмусен, и како со амбасадорите на земјите-членки на Алијансата води разговори околу напредокот на Македонија или, пак, како пред тоа ги испраќа македонските војници во мисија во Авганистан.

Ротацијата од прв човек во одбраната на втората позиција во земјоделство беше едно од поголемите изненадувања во смените на новиот владин кабинет и беше доживеана како уназадување на Коњановски. Но, едно од објаснувањата за неговата смена е дека министерското место во одбраната и' припаднало на ДУИ. Опозицијата, пак, на седницата за избор на замениците на министри оцени дека Коњановски го менуваат поради тоа што против него има кривична пријава за случајот со РЕК „Битола“, па дури и бараа тој воопшто да не биде дел од заменичкиот состав во Владата. Коњановски вчера не одговараше на мобилниот телефон и поради тоа не успеавме да го прашаме како ја доживува заменичката позиција и дали го сфаќа тоа како негово деградирање.

Ексминистерот за одбрана, сепак, покажува дека лесно знае да се престрои и да се снајде во нова улога. Досега има ротирано на неколку функции. Од работно место во Јавното претпријатие за наводнување „Стрежево“ во Битола е именуван за министер за локална самоуправа, а потоа заминува на директорска функција во РЕК „Битола“. Оттаму повторно е именуван на министерка позиција во одбраната, а во новиот владин состав стана и заменик во земјоделство. Но, и покрај тоа што ја изгуби министерската фотелја, со последните смени што ги направи неговиот лидер, Никола Груевски, тој повеќе не член и на Извршниот комитет на ВМРО-ДПМНЕ.