В четврток стасува примерок од украинските автобуси?

Во Скопје з��дутре се очекува да стаса примерок од украинските автобуси на компанијата „Лаз“, која има обврска до крајот на годинава да ја испорача првата тура 15 автобуси од вкупно 84 договорени со владината набавка. Автобусот што ќе стаса треба да биде подложен на испитувања од страна на Машинскиот факултет. Во меѓувреме, според најавите, во завршна фаза е и хомологацијата на автобусите што се врши во Германија.

И покрај тековните постапки, се' поизвесно е дека производителот нема да ја испочитува обврската согласно со договорот, 15 автобуси да почнат да возат по скопските улици најдоцна до 31 декември. Ниту од ЈСП „Скопје“, ниту, пак, од Бирото за метрологија и други институции инволвирани во проектот не сакаат официјално да ги коментираат случувањата и да прогнозираат дали и кога воопшто Украинците ќе ги испорачаат автобусите. Без коментар е и претставничката од „Лаз“, која веќе неколку дена престојува во Скопје.

Министерот за транспорт и врски, Миле Јанакиески, кој е потписник на владината набавка, неодамна единствено посочи дека во случај на доцнење со испораката производителот ќе плаќа пенали. Не кажа во кој случај договорот со компанијата евентуално би бил раскинат. (Дс.Т.)