Грција ја губи самодовербата околу спорот

Најдоброто решение секогаш е претходно предложеното - е оцена на шефот на ЕЛИАМЕП, Лукас Цукалис

Од нашиот дописник
Миркица Поповиќ

Атина - Претседателот на грчкиот тинк-тенк ЕЛИАМЕП, Лукас Цукалис, ја предупреди Атина дека мора да направи големи и ризични промени во начинот како ја води надворешната политика за да не стане уште една балканска држава што живее затворена во својот кафез и, поради несигурност, насекаде околу себе гледа само непријатели. Според него, на Грција и' требаат радикални промени на лицата што се занимаваат со надворешната политика и што ќе бидат сериозни претставници на демократијата и моќни партнери во регионот.

Иако за главен виновник за намалената самодоверба на Грција се смета економската криза, сепак професорот Цукалис посочува дека пример за тоа е и начинот на кој Атина се справува со спорот за името. „Конфликтот со државата која не ја именуваме, ФИРОМ, и фактот дека чувствуваме закана од една мала и економски слаба држава претставува карактеристичен пример за немање самодоверба. Нашата држава беше помоќна страна, но не успеа добро да се справи со овој спор. Компромисните решенија кои беа предложени во 1993 денес ги надминуваат и најоптимистичките очекувања и треба да размислиме каде беа направени грешки. Ова прашање сепак е исклучокот во однесувањето на Грција. Во секој друг поглед државата тогаш почна да се однесува како напредна европска држава“, истакнува Цукалис.

На прашање дали грчката надворешна политика станува попустлива, тој одговори дека во секој дијалог треба да се направи разлика меѓу она што се посакува како решение и она што е возможно. Притоа, ги посочи спорот за името со Македонија и кипарското прашање како примери од кои се гледа дека најдоброто решение секогаш било она претходно предложено. „Оној што ги предлага принципите на преговорите треба да ги објасни и последиците од овој став.“, смета претседателот на ЕЛИАМЕП.

Цукалис посочува дека Грција е средно голема држава која се наоѓа во специфичен регион во кој се уште има неразрешени прашања и проблеми меѓу соседите, кои се одлучувачки за границите на некои од балканските држави. „Не сме во Бенелукс. Она што мора да го направи Грција е да бара моќни сојузници, да има документи поткрепени со факти и да одржува највисоко ниво на сигурност и имиџ на стабилна држава на меѓународната сцена“, нагласува Цакалис, додавајќи дека овие работи се неопходни за државата да може потоа да реши како и до каде ќе преговара со соседите со кои е во конфликт.