ИВЗ условува за религискиот собир во Охрид

Исламската верска заедница го услови своето присуство на Меѓународната конференција за меѓурелигиски и мултикултурен дијалог што ќе се одржи на почетокот на мај во Охрид, со решавањето на повеќе прашања што ја засегаат. Тоа, пред се', се проектот „Скопје 2014“, возобновувањето на Бурмали-џамијата, денационализацијата на вакуфскиот имот, прилепската џамија и верскиот објект во село Лажец, Битолско.

За проблемите што ја преокупираат ИВЗ, како што беше соопштено на вчерашната прес-конференција, во изминатите денови е разговарано со претседателот Ѓорѓе Иванов, со премиерот Никола Груевски и со неколкумина министри, меѓутоа, и покрај искажаната желба да се најде решение, ИВЗ нема ниту еден конкретен предлог за надминување на кое било од отворените прашања. Доколку тие не бидат решени, а со цел „да се избегне натамошна дискриминација на ИВЗ“, Собранието на Заедницата бара од Ријасетот и од поглаварот Сулејман Реџепи за своето неучество на Меѓурелигиската конференција да ги информираат исламските заедници и меѓународните асоцијации за исламско верско организирање. (Б.Ј.)