Концерт на Бајага - за роденденот на Карпош

Со концерт на „Бајага и инструктори“ и Влатко Стефановски на 3 ноември во салата „Форца“, Општина Карпош ќе ја заврши седумдневната прослава на 34. роденден што со разни активности почна да го одбележува од вчера. Во чест на роденденот под мотото „За Карпош што го сакаме“, општинарите деновиве ќе организираат турнири во шах, табла, пинг-понг и други дисциплини, како и крводарителна акција, уметнички изложби, ќе пуштат во употреба неколку реконструирани улици.

Токму на денот на општината, на 3 ноември градоначалникот Стевчо Јакимовски и администрацијата официјално ќе се преселат во реконструираниот објект на поранешното училиште „Братство“ во Нерези, а еден ден претходно во Кинотеката на Македонија ќе се одржи свечена академија. Градоначалникот Јакимовски вчера најавувајќи ги роденденските активности даде и мини- отчет за сработеното во изминатава година. Информираше дека вкупно се реализирани 200 инфраструктурни проекти, меѓу кои атмосферска канализација на 17 улици, фекална канализациона мрежа на 15 улици, 52 пешачки патеки, асфалтирани 19 улици... „И натаму ќе продолжиме да работиме со истиот интензитет и убеден сум дека до крајот на мандатот ќе ги решиме сите акутни инфраструктурни проблеми“, дополни Јакимовски. (Дс.Т.)