„Цивил“ прогнозира повторно насилство на прегласувањето
Претседателот на невладината организација „Цивил“, во чиј фокус е проблематиката поврзана со оружјето на овие простори, Џабир Дерала, прогнозира оружени инциденти и за време на прегласувањето в недела.
„Насилството тлее и верувам дека ќе експлодира во секоја можна прилика без оглед на притисоците на домашната и меѓународната јавност. Тоа што мораме да го направиме е да го активираме системот што ќе ги третира сите граѓани еднакво, а престапниците ќе ги казни и елиминира од политичката сцена“, коментира Дерала.
Невладината „Цивил“ ќе им предложи на парламентарците од досегашниот состав да ја потпишат Декларацијата за поддршка на консултативниот процес за Спогодбата за трговија со оружје, која официјално беше најавена да се промовира вчера.
„Иницијативата е упатена до сите парламентарци во светот да ја поддржат оваа меѓународна спогодба за трговија со оружјето со која се воведуваат стриктни норми за контрола на трансферите на оружје, со надеж дека откако на меѓународно ниво ќе се донесе спогодбата, побрзо и полесно ќе оди процесот на ратификација на национално ниво. Декларацијата со потписите понатаму ги праќаме до ОН, каде што од 14 до 18 јули ќе се одржи биеналната средба“, појаснува претседателот на „Цивил“. (Ж.Х.З.) |
