Отворена винарската визба „Стоби“ на Минчо Јорданов

Досегашната инвестиција чини 15 милиони евра

ВЕЛЕС – Винарската визба „Стоби“, сопственост на бизнисменот Минчо Јорданов, која се наоѓа кај Градско, беше отворена завчера. Производството на винарницата е исклучиво од сопствените лозови насади, според најсовремени стандарди пропишани од Европската унија, со органска заштита на грозјето и под постојана строга контрола од врвните македонски енолози.

„Комбинатите ’Вардар Градско‘ и ’Црвени Брегови‘ имаат најкомпактни површини со грозје, околу 600 хектари, од нив 540 се стари, а 60 хектари се нови насади. Оттука е логична одлуката за изградба на винарска визба“, изјави Јорданов по отворањето.

Неговата стратегија, како што објасни, не била како на другите винарски визби -да се произведуваат преголеми количества вино со мал процент шеќерни единици, туку помалку, но со висок квалитет. Ако двата комбината имаат примарно производство од 4,5 милиони евра, винарската визба ќе реализира продукт вреден осум милиони евра.

Досегашната инвестиција на Јорданов во „Стоби“ е 15 милиони евра. Тој планира да вложи и дополнителни два-три милиони евра во баркод и ресторан, со што вкупната инвестиција би ја заокружил на 18 милиони евра.

Дане Јованов, технички директор на визбата, објасни дека капацитетот е 4,5 милиони литри, а технологијата на производство и линијата за полнење се автоматизирани. Линијата за полнење е со капацитет од 5.000 шишиња на час и обезбедува највисок степен на чистота на виното без никакви примеси.

Во „Стоби“ работат 30 лица, додека на лозовите насади се ангажирани околу 330, со тенденција нивниот број да се зголеми. Досега виното се пласираше на македонскиот пазар, а она во шишиња од неодамна се најде и на пазарите во Холандија и во Германија. (Ек.Р.)