Откриено дувло на проституција во Карпош

Откриен нов случај на проституција во Скопје. Триесет и седумгодишна гостиварка е откриена во изнајмен стан во скопската населба Карпош, каде што подведувала две девојки на проституција. Целиот ќар од „бизнисот“ најпрво одел во џебот на макрото од Гостивар. Потоа дел од добиените пари таа им ги давала на двете девојки од Кичево и од Штип, кои работеле за неа. Според сознанијата на полицијата, низ станот во Карпош поминале од 100 до 150 клиенти во изминатиот период. За сексуалните задоволства со девојките тие плаќале од 1.500 до 3.000 денари.

Полицијата поднесе кривична пријава до Обвинителството против гостиварката Е.Е. поради посредување при вршење проституција, а истражен судија и' одреди притвор од 15 дена.

Според сознанијата од полициската истрага, станот што го изнајмила гостиварката на улицата „Бранислав Нушиќ“ повеќе од една година бил дувло на проституција, во кој постојано навраќале најразлични клиенти.

Се' започнало уште во април минатата година кога жената-макро почнала да организира средби и во станот да носи луѓе што ги познавала. Двете девојки М.И. (31) од Кичево и Ј.С. (34) од Штип биле задолжени да ги задоволат страстите на посетителите, со кои спиеле за пари. Како што раскажале двете девојки во полиција, тие во изминатиот период спиеле со околу 150 клиенти, кои навраќале често и плаќале различна сума за сексуалните услуги.

„Парите ги земала гостиварката, а двете девојки добивале половина од договорената цена“, велат во МВР. Сексот го нуделе во една од собите во станот, а понекогаш сето тоа се одвивало пред очите на макрото од Гостивар. (Д.Т.)