На Игор Спасов му била простена и сообраќајка

Доколку во МВР нема лица што се со идентични генералии, тогаш е можно да станува збор за истиот Игор Спасов, кој брутално го претепа младиот Мартин Нешкоски

Љубиша Станковиќ

Доколку во Министерството за внатрешни работи не постои уште еден вработен на возраст од 31 година и доколку и тој не е роден во Штип, тогаш постои голема веројатност „тигарот“ Игор Спасов, кој е осомничен за убиството на младиот Мартин Нешкоски, и другпат да бил покриван од МВР за незаконски дејства.

Игор Спасов, според сознанија до кои дојде „Утрински весник“, и порано бил во судир со законот. Припадникот на полициската единица „Тигар“ е веројатно истото лице што пред повеќе од три години било учесник во сообраќајна незгода, во која едно лице се здобило со повреди.

Настанот во кој се споменува името на Игор Спасов се случил на 18 ноември 2007 година. Иако во сообраќајката полесно било повредено само едно лице, овој случај го следат одредени недоследности и отстапувања од правилата.

Целата приказна што се поврзува со името на Игор Спасов започнува критичниот ден во 5,45 часот кога на крстосницата од булеварот „Никола Карев“ и „Трета Македонска бригада“ се случила сообраќајна несреќа во која учествувале две патнички возила.

Во незгодата, освен Спасов, учествувало уште едно лице на возраст од 61 година. Човекот управувал возило „тојота корола“, а Игор Спасов „сеат ибица“, сопственост на Владата на Република Македонија.

Кој бил предизвикувач на сообраќајката, во која возачот на „тојотата“ се здобил со повреди, е помалку битно, но она што треба да се нагласи е фактот дека Спасов го управувал возилото без патен налог!

Тој пред увидната екипа самиот кажал дека кога тој и неговите колеги се на работно место, не користат патни налози и затоа и не ги носат.

Доколку сево ова што го кажал е точно, тогаш недвосмислено се поставува прашањето - дали воопшто може да се управува службено возило без службен патен налог?

Од увидот што го извршила екипа на Одделението за безбедност во сообраќајот може да се заклучи дека и на Спасов и на возачот на „тојотата“ им бил направен алко-тест, со алкомер-дрегер, но не е познато кој од нив управувал под дејство на алкохол.

Какви биле вистинските резултати не само од тестирањето, од комплетниот увид, е непознато бидејќи сообраќајната полиција можела да констатира дека била причинета материјална штета од 100.000 денари.

Едно од клучните прашања е што навистина се случувало на крстосницата од двата скопски булевара? Дали некој од возачите возел со неприспособена брзина и под дејство на алкохол? Зошто возачот на „тојотата“, кој се пожалил на повреди, морал да остане на самото место се' до крајот на увидот?

На сиве овие прашања се надоврзува и она што се однесува на неизлегувањето истражен судија на самото место, и покрај тоа што бил известен за настанот? Истражниот судија од само нему познати причини не дошол на местото каде што се случила незгодата, но набргу тој бил поставен на друга, исклучително висока позиција во судството.

За инцидентот во кој учествувал Игор Спасов, преку Дежурниот оперативен центар - ДОЦ бил известен и Секторот за внатрешна контрола и професионални стандарди, но и тие не излегле на посоченото место.

Токму непојавувањето на лицата од Секторот за внатрешна контрола и професионални стандарди остава простор за сомнеж во начинот на кој се водела постапката во која учествувал штипјанецот Игор Спасов.

Од нивното однесување може да се заклучат две работи: или тие со непојавувањето се ставиле на страната на нивниот вработен или навистина и самите се непрофесионални, што, пак, претпоставува и злоупотреба на нивните овластувања? Исто така е нејасно како е можно полициски службеник да учествува во сообраќајка и тоа со возило што е во сопственост на државата, а Секторот за внатрешна контрола да не реагира ниту по едната ниту по другата основа?

Легитимно право на МВР е да ги заштитува своите вработени, но само доколку е тоа во рамки што не ја надминуваат линијата на толеранција. Сепак, доколку некој вработен во МВР предизвика сообраќајка и притоа се направат серија пропусти во постапувањето, тогаш оправдувања не постојат, како што нема и не смее да ги има и за однесувањето на Игор Спасов, кој до смрт го претепа младиот Мартин Нешкоски.