Претходен број

Никола Груевски денеска ќе го добие мандатот

Премиерот Никола Груевски и претседателот Бранко Црвенковски едеа еден до друг на конститутивната седница

Конституиран новиот парламент, а за нов спикер беше избран Трајко Велјановски од ВМРО-ДПМНЕ

Владејачката ВМРО-ДПМНЕ остана без коментар за отсуството на ДПА, опозицијата го протолкува како погрешен потег, а ДУИ иронизираше дека не го забележале отсуството на своите главни политички противници.

На ова прво свикување на парламентот беа верификувани мандатите на 114 пратеници, за кои ДИК ги потврди и мандатите, вклучувајќи ги и оние на ДПА. Мандатите на шестемина пратеници ќе бидат дополнително верификувани, откако ќе бидат познати одлуките на Врховниот суд по жалбите и по дополнителното прегласување идната недела на неколку избирачки места во „шестката“ и во „единицата“.

Инаку, на конституирањето на парламентот присуствуваа претседателот на државата, Црвенковски, премиерот Груевски и членовите на Владата, поранешниот претседател Киро Глигоров, ексспикерот Љубиша Георгиевски, претставници на судството и на верските заедници во Македонија, претседателот на ДИК, Јован Јосифовски. Членовите на дипломатскиот кор во земјата седницата ја следеа од собраниската галерија, но меѓу нив не беа американската амбасадорка Џилијан Миловановиќ и евродипломатот Ерван Фуере.

И на оваа конститутивна седница, како и минатиот пат, го немаше лидерот на ДУИ, Али Ахмети. Неговото отсуство потпретседателот на ДУИ, Џеват Адеми, го оправда со презафатеност со други обврски, но не откри која работа му била позначајна од верификувањето на мандатот и конституирањето на парламентот.

Интересно е тоа што во овој парламентарен состав има само 40-ина нови пратеници, другите се од претходниот состав. Коалицијата „За подобра Македонија“ предводена од ВМРО-ДПМНЕ освои 63 мандати, „Сонце- коалиција за Европа“ има 27, ДУИ - 18, ДПА - 11 и ПЕИ еден пратеник. Меѓу оние кои премиерно влегоа во Собранието има познати личности во јавноста: Борис Стојменов, Зоран Коњановски, Андреј Петров, Горан Минчев, Ермира Мехмети, Имер Селмани, Сулејман Рушити, Имер Алиу, Емилија Станковиќ (на местото на Зоран Заев, кој се повлече). Пратеничкото искуство и во овој состав ќе го продолжат тројцата ветерани Стојан Андов, Тито Петковски и Љубисав Иванов-Ѕинго.

За Велјановски позитивно се изјаснија 79 пратеници од коалицијата „За подобра Маке��онија“ и од ДУИ, 19 опозиционери беа воздржани, а немаше ниту еден против. Велјановски, сепак, доби честитки од сите пратеници во салата.

„Со моето работење ќе се трудам да направам баланс помеѓу политичките сили. Квалитетната работа на Собранието ќе биде моја обврска. Еднаквиот третман на пратениците ќе биде моја заложба, интересите на Република Македонија ќе бидат моја цел. Знам дека сите ние заедно ќе го направиме македонското Собрание вистински храм на македонската демократија. Ова Собрание нема само како сенка да ја следи работата на Владата и да ги коригира, дополнува или редефинира нејзините проекти во квалитативна смисла, туку и ќе продуцира и создава. Ова Собрание ќе биде наша гордост и јас со сиот мој авторитет ќе се борам заедно со сите вас да успеам во таа намера“, потенцира Велјановски од спикерското место веднаш по давањето на свечената изјава.

На крајот од излагањето тој му се заблагодари на Георгиевски, како што рече, за енергијата и посветеноста со која ја вршел функцијата претседател на Собранието. (О.В.)