Груевски има воспалени мускули

ТЕТОВО - „Од кревање лопати и поставување камен-темелници на, наводно, нови објекти, Груевски доби воспаление на мускулите. Тој е најголемиот физички работник во земјата, а од сето тоа што работи ништо не се гледа“, вака Тито Петковски го започна своето искажување пред членовите и симпатизерите на трибината на НСДП во Тетово, насловена „И трудот е капитал“. „Затоа, пак, вистинските работници живеат се' потешко. Најмалку 30 отсто од вработените имаат плата од 5.500 денари, а во текстилот дури и 4.000. Не им се плаќаат придонеси, немаат регулиран работен стаж. Средната класа сосема е изгубена. Македонија стана најсиромашна држава во регионот“, рече Петковски.

Тој смета дека на работниците им се скратени сите права. Не смеат да протестираат, да штрајкуваат, да побараат нешто на што имаат право. Ваквата состојба се должи на големата невработеност, на фактот дека на пазарот на трудот има огромна работна сила, а побарувачката е многу мала. „Работникот е максимално деградиран, понижен, уништено му е човечкото достоинство. Се живее како во периодот на раниот капитализам од пред 150 години“, коментираше Петковски. Според лидерот на НСДП, во нашата земја се' почнува и завршува со Никола Груевски. „Никој ништо не смее да каже, а уште помалку да направи ако не добил виза од Груевски“. (Г.Е.)