Претходен број

Поглед

Препишувачи во Владата

Соња Маџовска

Нови актери, стари идеи. Власта, во недостиг од свои и оригинални идеи како да ја извлече земјава од кризата, ги надградува и проширува старите идеи на Васил Тупурковски. Циле го нема да искоментира и да се побуни, ама затоа власта, за да не изгледа дека „апла“ ги препишала неговите, своите ново-стари идеи ги дува како балон.

Директорот на Агенцијата за странски инвестиции, Виктор Мизо, наместо Тајванците, сега ги повикува Кинезите да отворат фабрики во Македонија, а потоа од кај нас да извезувале во Европа. Милијардата на Циле од 1998 година, десет години подоцна, стана 8 милијарди на Груевски. Циле го израмни „Бунарџик“, а оваа власт, иако го воскресна, ништо од реализацијата.

Тајван со 23 милиони жители е минијатура во споредба со моќната Кина од 1,3 милијарди жители. Една во споредба со 8 милијарди евра инвестиции е гола вода, а влезот на странски брендови што би се произведувале во „Бунарџик“ е посакуван сон.

Иако не ги сакаме веќе, Тајванците имаат една оригинална идеја како да излезат од кризата. Ако и нашата Влада ја примени, верувам дека на неа ќе падне барем женскиот дел од македонската популација. Во обид да ја победи глобалната кредитна криза, владата на Тајван планира на секој од 23-те милиони жители на островот да му врачи ваучер за шопинг, во вредност од 80 евра. Парите ќе можат да се користат во бутици, ресторани и супермаркети. Целта на оваа идеја на Тајванците е да ја помогне економијата и да го зголеми бруто-домашниот приход за 0,64 отсто. За реализација на планот, ќе биде потребен буџет од повеќе од 2 милијарди евра. На премиерот Груевски ќе му бидат потребни многу помалку пари, или 160 милиони евра.