Жители од Аеродром и од Карпош 2 сметаат дека на „Топлификација“ и' одговараат надворешните температури, па затоа штеди на парното

Жители од населбите Аеродром и Карпош 2 се жалат на слабо парно во изминативе денови, особено во утринските и во вечерните часови. На „Топлификација“ и' одговараат повисоките надворешни температури, па веројатно и штедат во дистрибуцијата на топлинска енергија, коментираат тие. Се жалат на студени домови, сосема незагреаните радијатори наутро и млаки попладне, кога по работните обврски се прибираат во своите домови. Загарантираните 21 Целзиусов степен според условите за испорака на топлинска енергија не ги исполнуваат, а ние не можеме да го докажеме тоа, се жалат граѓаните.

Веќе цела недела до 9 часот наутро речиси студени им се радијаторите на станарите во зградата број 11 на булеварот „Јане Сандански“. Ниту попладне не се многу топли како што беа некогаш, се пожалија од оваа станбена зграда. Притоа, напоменаа дека од самото парно имаат и подно греење. Тоа сега како сосема да откажало и според тоа, заклучуваат дека навистина им е студено. Во друг случај подот им бил топол . Тие не знаат дали можеби станува збор за дефект. Но, и во тој случај една седмица е премногу време за тој да биде отстранет. И станарите во зградата број 1 на улица „Веселин Маслеша“ во населбата Карпош 2 велат дека имаат слабо парно. По проверката што ја направија на сите параметри на станбениот објект во Аеродром, од „Топлификација“ ни потврдија дека нема дефект.

„Мора да се провери дали можеби станува збор за индивидуален проблем во некој стан. Точно е дека вчера имавме поплака за греењето од зградата број 11 на булевар „Јане Сандански“, но во 9 часот наша екипа беше таму и утврди дека се' е в ред. И сега кога ја гледам испораката на топлинската енергија, протокот на температура и сите други параметри, заклучувам дека нема проблем. Ако поединечно некој стан има проблем, сопственикот треба да го пријави тоа, вели Алфонс Вета, одговорен за испорака на топлинска енергија во АД ’Топлификација’“. (Сн.К.)