Претходен број

Валандово е најевропскиот град


Претседателскиот кандидат Ѓорге Иванов прексиноќа го прогласи родното Валандово за најевропски град во Македонија. Кога многумина на митингот на коалицијата „За подобра Македонија“ помислија дека епитетот се должи на фактот дека од Валандово се и Иванов и неговиот противкандидат Нано Ружин, фаворитот на ВМРО-ДПМНЕ пред присутните појасни дека неговиот роден град бил најблиску до две држави-членки на ЕУ. „Валандово е 20 километри оддалечено од Грција и 30 километри од Бугарија“, рече Иванов, додавајќи дека ниту Гевгелија не е поевропска, бидејќи иако е на самата граница со Грција, Бугарија била подалеку. За Иванов четврток е симболичен ден, кога дошол во родниот град се случило изгласување на резолуција во Европарламентот за Македонија да ги почне преговорите за членство. „Имавме гостин од шведскиот парламент, а беше и чешкиот премиер кој е претседавач на ЕУ. А некој вели дека сме биле изолирани. Кај видоа изолација во сето ова. Се виде кои и' се пријатели на Македонија и како знае да се почитува она што го прават Македонија и Владата на чело со премиерот Груевски“, рече Иванов. (Д.Р.)