Изборите не се топ-тема во Штип
Штипјани прогнозираат мртва трка за градоначалник меѓу Здравко Коцев и Зоранчо Алексов
Жаклина Хаџи-Зафирова
Штип - На штипјани им е преку глава од празни ветувања, но, сепак, тоа не им пречеше да го посетат митингот на социјалдемократите кој завчеравечер се одржа во Домот на културата. Митинзите, велат штипјани, уште одамна го изгубија сјајот во градот под Исарот, а тоа се виде и кај присутната публика, меѓу која најголем дел беа од редовите на партиските активисти и гласачкото тело. Меѓу нив, претежно пензионери, стечајци, но и дел од професорската фела во градот.
Салата на Домот, која собира 615 седишта, беше исполнета до последното место, а немаше да се фрли игла ниту од страните, каде што двочасовниот митинг во помал број го следеа и заинтересирани граѓани кои дојдоа во живо да ги слушнат понудите на кандидатите. Штипјани велат дека социјалдемократите првпат одржуваат митинг во сала, иако претходно било предвидено тој да се одржи на плоштадот, но, наводно, бил презакажан поради можност да се влоши времето.
Тие со внимание го следеа обраќањето на кандидатите на СДСМ, чии обраќања беа проследени со аплаузи, но најмногу ги доби кандидатот за градоначалник на Штип, Здравко Коцев. Уште на самиот официјален старт на кампањата, Штип стана интересен, посебно по пресудата во судскиот спор за клевета меѓу кандидатите за градоначалници на СДСМ и на ВМРО-ДПМНЕ, Здравко Коцев и Зоранчо Алексов. Штипјани прогнозираат дека ќе има занимлива трка меѓу двајцата поради угледот што го уживаат кај гласачкото тело. Едниот, Коцев, како директор на комуналното претпријатие „Исар“ се докажал како добар менаџер, а штипјани го паметат посебно по реновирањето на бањата „Кежовица“, без која не можат да си го замислат животот, бидејќи имаат редовна навика да ја посетуваат во текот на неделата. Од друга страна, на ВМРО-ДПМНЕ му го припишуваат отворањето на Штипскиот универзитет, што влече поени на сметка на Алексов.
Присутните приоѓаа да се поздрават со кандидатите на СДСМ додека се приближуваа до говорницата, скандирајќи ги нивните имиња. Во салата вриеше од партиски знамиња и симпатизери облечени во партиски маици и капчиња.
Љубомир Фрчкоски, обраќајќи им се на присутните, рече дека власта ја довела државава до изолација и сиромаштија. Наместо тоа, тој вети влез во НАТО оваа година, а потоа и во ЕУ.
„Ја ослабеа позицијата на Македонија во спорот со Грција за две години. Со античките приказни намерно го поделија македонското национално ткиво и не' посрамотија надвор. Македонците имаат идентитет и културни корени на кои се горди. Нема да дозволиме авантуристи да го преиспитуваат нашиот идентитет и да не' држат заковани на дното на Западен Балкан“, рече Фрчкоски на митингот во Штип. Но, не пропушти да го спомене и својот противкандидат Ѓорге Иванов, кого го нарече недоветен.
Откако го заврши говорот, Фрчкоски им се придружи на младите луѓе кои стоеја на бината, а се на листата на СДСМ за Штип. Но, младите не беа во значителен број присутни и на митингот на партијата. Во исто време додека се одржуваше партискиот митинг, надвор трештеше музика од околните кафеани, полни со млади луѓе.
Најинтересниот дел од митингот на СДСМ беше моментот кога актуелниот кандидат за градоначалник на Штип, Здравко Коцев, му фрли ракавица на струмичкиот градоначалник и в.д. претседател на партијата, Зоран Заев, повикувајќи го на „двобој“ за тоа кој ќе направи поубав град. Заев пред присутните рече: „Наместо ЕУ и НАТО, доживеавме невидена изолација. Наместо намалување, зголемување на невработеноста. Наместо капитални инвестиции, едно чудо потрошени пари за саморекламирање. Наместо странски инвестиции, голема нула. Сето тоа во услови кога работат седум дена во неделата, по 24 часа на ден, тоа значи дека не спијат. А позаспана влада не можеме ни да сонуваме“, изјави Заев.
Кандидатот за градоначалник на Штип, Здравко Коцев, рече дека зад него стојат дела. Тој најави реконструкција на градскиот плоштад и фонтана, проекти за бањата „Кежовица“, уредување на влезовите во градот и паркинг кај реката Отиња. |
