Насловна

Охриѓани бараат клуч на врата за кабареата во Сараиште

Охрид - Поголема група жители од охридската крајезерска населба Сараиште, иницирана од некогашниот член на култната охридска група „Билјана“, Кузман Поп Стефанија, викендов една ноќ пробдеа, а малку недостасуваше да дојде и до физичка пресметка со сопствениците и со обезбедувањето на ноќниот клуб „Џез ин“. Тие од надлежните државни органи бараат итно да се преиспитаат и да се одземат издадените дозволи за работа и во иднина во стариот дел на Охрид воопшто да не се издаваат одобренија за кабареа, дискотеки и за ноќни клубови.

Поддршка на жителите стигна од многу граѓани на Охрид, но и од локалната самоуправа. И оттаму ги поддржуваат реакциите на жителите од стариот дел на градот, кои поради бучавата од угос��ителските објекти не можат да спијат до раните утрински часови.

„Одобренијата за работа на угостителските објекти не ги издава локалната самоуправа, туку надлежните органи на Владата, кои во најголем дел се задолжени и за контрола на нивното законско работење“, реагираат од охридската локалната самоуправа. Тие потсетуваат дека централната власт мора да се грижи за спроведувањето на прописите и да ги заштити граѓаните што живеат во старото градско јадро.

Според нив, слична е состојбата и со издадените концесии за плажите, кои надвор од законските прописи, наместо да се затвараат по 20 часот, како дискотеки на отворено работат до раните утрински часови. (В.М)