Претходен број

Берлин побара трпеливост за визите

Членките на ЕУ сакаат да имаат контрола врз последиците од либерализацијата, изјави германскиот шеф на дипломатијата, Франк Валтер Штајнмаер, за „Утрински весник“

Според чешки дипломати, Македонија е единствена што ги исполнила сите услови

Од нашиот дописник
Слободанка Jовановска

Брисел - Германскиот шеф на дипломатијата, Франк Валтер Штајнмаер, побара трпеливост во земјите од Западен Балкан, но и разбирање дека процесот на укинување на визите треба да оди стапка по стапка. Ваквата порака тој ја упати по министерскиот состанок на ЕУ во Брисел, демонстрирајќи очигледно дека ова прашање предизвикува нервоза во Берлин и се следи со големо внимание.

„Ние сфаќаме дека основна цел на овој процес е целосна визна либерализација. Но, морате и вие да разберете, исто така, дека земјите-членки и, конкретно, министрите за внатрешни работи се заинтересирани да не го испуштат овој процес од раце т.е. да имаат контрола врз последиците од либерализацијата. Затоа, бараме трпеливост околу процесот. Германија, според тоа, не е земја која го блокира, но ние сакаме да бидеме сигурни дека либерализацијата ќе дојде чекор по чекор“, изјави Штајнмаер за „Утрински весник“.

Претставник на германската влада беше уште поексплицитен, оценувајќи дека се „обично ѓубре“ тврдењата оти Германија го блокира укинувањето на визите, бидејќи е факт дека мнозинството земји-членки се договориле за одредена процедура и таа сега треба да се испочитува. „Постојат ’патни мапи‘ за либерализација на визите, погледнете ги“, препорача тој, избегнувајќи го зборот укинување на визите и инсистирајќи на зборот „процес“ на либерализација.

Извори од полската влада потврдија дека околу визите се' уште се кршат копјата и оти отпорот да се оди кон нивно укинување е голем од страна на Германија и на Австрија. Според овој извор, Полска бара либерализација на визниот режим за балканските земји, и од нивна гледна точка, најдобро е нив воопшто да ги нема. Задржувањето на визите не е начин Балканот да влезе во ЕУ, оцени овој извор, додавајќи дека, кога веќе се противат некои земји, можеби е подобро да се примени американската практика, каде што има огромен број различни визи и за долг временски рок.

Ваквите оцени сугерираат дека во Брисел се' уште нема јасен став околу исходот на преговорите за визите и оти постои притисок и тенденција наместо укинување да се форсира натамошна либерализација на визниот режим, бидејќи така ќе можат да влезат и земјите кои не ги исполнуваат условите во моментов.

Тоа го фрли во сенка извешта��от за напредокот околу исполнувањето на условите во балканските земји, кој на новинарите во Брисел им беше раскажан, но не и доставен од претседавачот, Чешка.

Според чешки дипломати, Македонија е единствена земја која ги исполнила сите услови за укинување на визите, Црна Гора би можела да се најде на белата шенген-листа, додека околу Србија се појавиле отворени проблеми, пред се', околу можноста да им се издаваат пасоши на Србите во БиХ и на Албанците на Косово. БиХ и Албанија не се надеваат на позитивна оцена, бидејќи се најдалеку во исполнувањето на патните мапи. Заменик-шефот на чешката дипломатија, Јан Појар, изјави дека извештајот содржи стотина страници и оти ќе им треба време на земјите-членки да го разгледаат и да се изјаснат, но најави таков состанок веќе за наредната седмица.