Претходен број

Владата нема да се жали за „Радко“

Промоцијата на „Радко“ во 2000 г. заврши со инцидент

Македонија, по изгубениот спор во Судот во Стразбур, ќе го регистрира пробугарското здружение

Светлана Унковска

Владата донела одлука да не поднесува жалба на пресудата на Европскиот суд за човекови права во Стразбур, кој пресуди во корист на Здружението „Радко“. Со тоа ја оспори одлуката на Уставниот суд на Македонија, со која ова здружение беше распуштено на 21 март 2001 година. Ваквата одлука значи дека државава ќе мора да ја овозможи неговата регистрација без притоа да се жали на ваквата пресуда на Судот во Стразбур.

На затворена седница на Владата, одржана на 7 април, била разгледана информацијата од пресудата на Европскиот суд за човекови права по жалбата на пробугарското здружение на граѓани „Радко“ и неформалниот претседател Борис Паунковски против Македонија. Владата на истата седница ја донела и одлуката, а потоа со писмен допис под назнака „доверливо“ го известила Министерството за правда дека Владата одлучила „владиниот агент да не иницира жалбена постапка пред Големиот судски совет на Европскиот суд за човекови права“.

Исто така, одлучено е „владиниот агент да ја извести Владата за правосилноста на пресудата на предметот ’Радко‘ и Паунковски заради преземање мерки за извршување обврски кои за Република Македонија произлегуваат од пресудата“, наведено е во владиниот документ доставен до Министерството за правда, до кој дојде „Утрински весник“.

Спорот со пробугарското здружение „Радко“ Македонија го загуби во почетокот на годинава, кога Европскиот суд за човекови права донесе одлука дека нашава земја во овој случај го прекршила членот 11 од Европската конвенција за правата на човекот, кој се однесува на правото за слободно здружување. Нејзиниот неформален претседател Борис Паунковски, кој има македонско и бугарско државјанство, ја оспори пред Судот во Стразбур одлуката на Уставниот суд на Македонија, со која беше забранета регистрацијата на ова здружение поради ширење верска и национална омраза. Судот во Стразбур одреди и отштета од пет илјади евра, а против оваа одлука тогаш гласала единствено судијката од нашава земја Мирјана Лазарова-Трајковска.

Првото основачко собрание на „Радко“ беше одржано во 2000 година, но беше прекинато поради инцидент кој се случи на самиот собир, по што беше претепан и новинарот Спасе Шуплиновски.

Во март оваа година, Здружението „Радко“ на чело со Паунковски побара и промена на Уставот на Македонија со кое Бугарите во земјава би станале конститутивен ��лемент на Уставот. Во барањето е наведено и тоа еден од службените јазици да биде бугарскиот и, како што беше истакнато, „да се забрани присвојување и крадење на бугарската историја во Македонија“. Ова писмо со барања беше проследено и до тогашниот претседател на државата, Бранко Црвенковски, Владата и бугарската амбасада во земјава. Во него Македонија се обвинуваше дека во земјава нема демократија, бидејќи државава го „легализирала извршениот геноцид врз бугарското население во Македонија во Втората светска војна“.

Наспроти ова, пак, предметот ОМО „Илинден“ - ПИРИН против Бугарија никако да добие разврска. Комитетот на министрите на Советот на Европа, кој е задолжен за следење на пресудите на Судот за човекови права, по повеќе од три години по донесувањето на пресудата од 19 јануари 2006, се' уште не може да ја спроведе во целост пресудата со која се бара регистрација на ОМО „Илинден“ - ПИРИН, политичка партија на непризнатото македонско малцинство во Бугарија. Властите на соседна Бугарија и натаму продолжуваат со убедувањата дека тие во целост ја спровеле пресудата, иако партијата се' уште не може да се регистрира.