За зрачење болните чекаат и по два месеца
Додека пациентите се на листа на чекање, на приватните пациенти им се закажува и за две недели
Јасмина Јовановска
На Клиниката за онкологија и радиологија пациентите за зрачна терапија чекаат и по два месеца. На болните со малигни заболувања кои првпат се јавуваат за лекување на оваа клиника отсега им се закажува термин за зрачење дури во втората половина на мај. Пациентите реагираат зошто толку многу мора да чекаат кога онколозите велат дека не треба да се губи драгоцено време и колку порано почнат да се зрачат толку подобро. „Ни велат навремено зрачење може да го спречи малигниот процес и да го намали ракот, а за да се зрачиме, чекаме и по два месеца“, се жалат пациенти од источниот дел на Македонија, кои не сакаат да го откријат идентитетот, па дури не сакаат да обелоденат од кој град доаѓаат.
Тие посебно се револтирани што слушнале дека местото за зрачење им го земаат болните кои приватно се зрачат на Онкологија. „Слушнавме дека ако имаш пари за зрачење, може да ти закажат и за две недели. Како за нив може да се најде термин побрзо, а за нас велат има ред и не' ставаат на листа за чекање“, укажуваат болните.
Моментно, како што неофицијално дознаваме, на Клиниката за онкологија приватно се зрачат дваесетина пациенти, и тоа главно од Косово.
А колкав приоритет им се дава на приватните пациенти покажува и податокот дека минатата недела на вработените на Онкологија им биле поделени екстра-хонорари од парите заработени со приватно лекување пациенти. Вишоци им биле поделени на сите вработени - од вратарите до директорката. Според извештајот до кој неофицијално дојдовме, најмногу пари и' биле одобрени на директорката, и тоа околу 120.000 денари, иако од Министерството за здравство на директорите им е забрането да работат дополнителна дејност. Најмал хонорар ќе добијат вратарите и курирот, и тоа околу 7.000 денари. Од парите од приватните пациенти се офајдиле и надворешните членови на Управниот одбор на Онкологија. За да ја потпишат одлуката за хонорарите, според неофицијални извори, вкупно на тројцата членови им биле одобрени 60.000 денари. Сумата пари што биле поделена како вишок, коментираат доброупатени извори, е толку голема што можело да се купи барем еден кобалт-апарат, кој одамна требаше да се исклучи поради небезбедно зрачење.
Зошто при зрачењето приоритет им се дава на приватните пациенти, објаснување не добивме од в.д. директорката на Клиниката за онкологија и радиологија, д-р Симонида Црвенкова. Во Министерството за здравство, пак, велат дека ќе испитаат зошто нашите пациенти чекаат за зрачење. Министерот за здравство, Бујар Османи, вели дека дополнителната дејност за директорите не е докрај регулирана и дека се подготвуваат нови договори за менаџерите во кои ќе се регулира и дополнителната работа. |
