„Штиптекс“ ја обнови фабриката во Радовиш
ШТИП - Штетите од невремето кое го зафати Радовиш на 4 декември минатата година се проценети на 210 милиони денари. Државата ќе оддели за обесштетување 30 проценти или околу 63 милиони денари. Даниела Иротова-Лазарова, претседателка на Комисијата за процена на штетите, вели дека исплатата ќе почнела овие денови.
Од стопанските субјекти во големата поплава најмногу настрада фабриката на штипската модна конфекција „Штиптекс“. Целосно беше уништен простор од над илјада квадратни метри, целокупниот машински парк, софистицираната компјутерска опрема, кројачницата, мебелот... Во халите имаше вода од над еден метар, а кога се повлече, останаа дебели наслојки од кал и друга нечистотија.
Во такви услови сопствениците на „Штиптекс“ го најдоа решението во префрлање на 160 работнички во фабриката во Штип. Во исто време се започна и со санацијата на објектот и со набавка на нови машини за побрз старт на радовишката фабрика.
„Ни беше голем трошок превозот на 160 лица од Радовиш до Штип и назад, а имаше проблеми и во организацијата на работата. Затоа што во штипската фабрика имаме 180 работници кои работат во една смена и со специфично работно време. Реагиравме бргу, во обновата на фабриката вложивме многу пари и од почетокот на февруари таа одново функционира“, вели Тодор Улански, косопственик на „Штиптекс“.
Штетата која ја претрпе „Штиптекс“ е проценета на 9,6 милиони денари. Иако штетата била поголема, во штипската конфекција се задоволни од процената според која како обесштетување ќе добијат 2,8 милиони денари.
„Задоволни сме бидејќи и тоа е некаква помош која ќе ги ублажи раните што ни ги нанесе големото невреме. Катастрофата е зад нас. Успешно се справивме со последиците. Но, сега работиме во услови на големи неизвесности и стравувања за иднината, бидејќи најавите од партнерите од Германија за идни нарачки воопшто не се розови. Никој о�� нас не може точно да каже како ќе биде во иднина. Сите сме во фаза на исчекување на потезите од европските партнери“, вели Улански. (И.Б.) |
