Повлекувањето на потерницата против Бошкоски изнудена со притисок
По наредба на истражен судија од скопскиот Кривичен суд, вчера е повлечена меѓународната и национална потерница за Љубе Бошкоски за случајот „Раштански Лозја“, затоа што престанале околностите за нејзино постоење. Веста вчера ни ја потврди и шефот на Истражното одделение на овој суд Седат Реџепагиќ, кој ги оцени како медиумски шпекулации пишувањата дека тоа е направено уште пред неколку дена.
По првичното објавување на веста во некои медиуми, „Утрински весник“ завчера побара потврда од министерот за правда Михајло Маневски, како и од државниот јавен обвинител Љупчо Шврговски. И двајцата потврдија дека потерницата е повлечена веќе неколку дена, затоа што престанала потребата од нејзино натамошно опстојување, бидејќи предметот „Раштански Лозја“ своевремено им бил предаден на хрватските правосудни органи.
Кој и зошто брзал со предвремено соопштување на ваквите вести? Неофицијално дознаваме дека во изминатите неколку дена бил вршен силен притисок врз истражниот судија Вања Јуруковски по секоја цена да издаде наредба за повлекување на потерницата. Во намерата да се изнуди ваква одлука, и тоа пред официјалното соопштување на пресудата против Љубе Бошкоски во хашкиот Трибунал, како што дознаваме, најупорни биле министерот за правда Михајло Маневски, државниот јавен обвинител Љупчо Шврговски, како и првиот претпоставен на истражниот судија, претседателката на Кривичниот суд во Скопје Добрила Кацарска.
Шефот на истрагата Реџепагиќ вчера не сакаше да се впушта во коментари околу тоа дали е вршен притисок врз неговиот колега да донесе ваква одлука. Околу несовпаѓањето на датумите кога е донесена ваква наредба, не' упати да побараме одговор од министерот Маневски и од обвинителот Шврговски. Вчера неколку пати телефонски се обидовме да добиеме коментар од Маневски и од Шврговски за ваквите тврдења, но не успеавме да ги добиеме. Судски извори за „Утрински“ тврдат дека кога станува збор за министерот Маневски, не е прв пат да интервенира и да врши притисоци кај одделни судии. (Г.Д.) |
