ЗЕЛС не одлучи кој ќе го замени Петров
Претседателот на ЗЕЛС Андреј Петров, кој стана член на парламентот, вчера и формално објави дека се повлекува од претседателската функција. Меѓутоа, Управниот одбор на ЗЕЛС вчера не донесе одлука кој ќе биде наследникот на Петров. Статутот на ЗЕЛС не предвидува кадровска промена на врвот во случај претседателот да премине од локалната во законодавната власт. Единствено е дефинирано дека првиот човек може да ги овласти потпретседателите да ги застапуваат интересите на ЗЕЛС. Додека ситуацијата од правна гледна точка не стане почиста, односно до изборот на нов претседател, што би требало да се случи во 2009 година, вршители на должноста ќе бидат потпретседателите на ЗЕЛС Коце Трајановски и Невзат Бејта. Градоначалниците на Гази Баба и на Гостивар ја претставуваат власта, а челното место во ЗЕЛС секогаш е резервирано за опозицијата. (К.Ч.) |
