Со пушачите, избега и заработката од локалите

Кафеанџиите ќе бараат попуштање на стегите за пушењето

Александрија Стевковска

Есенска пушачка револуција се подготвува во Македонија. Досега угостителите молчеа за целосната забрана за пушење во затворените простории, бидејќи гостите палеа цигара со кафе и по ручекот на терасите или бавчите. Сега, како што наближува 15 октомври, денот до кога се отворени летните тераси, кафеанџиите почнаа да се активираат и да смислуваат како да притиснат за менување на целосната забрана за пушење. На ова ги натера и ладното време, кое не дозволува да се доискористи ниту предвидениот рок за летните тераси, бидејќи посетителите, за да не смрзнат, со денови не седнуваат ни надвор. Оние што ќе седнат внатре, пак, а се пушачи, повеќе од половина време стојат надвор, на пушење. Тие се жалат дека забавата во градот, по воведување на целосната забрана за пушење, е замрена, бидејќи оние што излегуваат повеќе време поминуваат пред кафулињата и дискотеките отколку во нив.

Оние што не пушат, пак, велат законот е добар, бидејќи го штити нивното здравје, но ги штити и од забава, бидејќи нивните пријатели пушачи од потребата за цигара повеќе се надвор отколку онаму каде што би требало да бидат, односно онаму каде што е и забавата.

Угостителите тврдат дека не се во ситуација финансиски да преживеат уште една непушачка сезона како минатата зима, која им скрати дел од гостите, профитот, нивниот опстанок.

„Сезонава повторно го активиравме прашањето за менување на целосната забрана за пушење. За десетина дена ќе го формулираме моделот што ќе и' го предложиме на Владата. Тоа во никој случај не би било барање за целосно укинување на забраната за пушење, туку нејзино предефинирање и приспособување и на нашето работење, а формата би била со амандмани на законот. Сепак, не се надеваме дека ќе постигнеме многу, бидејќи Владата е затворена и не сака да преговара со нас за тоа прашање“, вели Феркан Бербери од Угостителско-туристичката комора при Сојузот на стопански комори.

Угостителите, најверојатно, ќе инсистираат на ланскиот предлог, во рамките на секој простор да се дозволи физички одвоен дел за пушачите, што би значело забраната да не важи за целиот објект. Тоа би им помогнало да ја пребродат зимата и не би ги принудувало да го намалуваат бројот на вработени, бран што го зафати овој сектор лани.

„Со забраната за пушење не можеме нормално да функционираме. Повеќето ќе дојдат во дискотеката и повеќе стојат надвор и пушат отколку што седат внатре. Просторот ми е празен цела ноќ, бидејќи лицата што доаѓаат во диско претежно се пушачи. Плус тоа, алкохолот бара и цигара, а тоа не е дозволено, па луѓето повеќе си прават дома журки, каде што можат да пушат, отколку да дојдат во диско. Со луѓето и цигарите, од локалите избега и заработката“, вели сопственик на дискотека.

Кафеанџиите тврдат дека и во текот на летната сезона имало намалување на прометот во затворените објекти поради забраната за пушење. Дури и официјалните статистички податоци покажуваат дека најголем пад во прометот, меѓу другото, е забележан во угостителството. Според статистиката, остварениот промет во угостителството во јуни 2010 година изнесувал 532 милиони денари и во споредба со истиот месец во 2009 година, кога не беше воведена забраната за пушење, прометот е намален за 9,4 проценти.

И додека угостителите реагираат поради намалениот промет, анкетите покажуваат дека мнозинството граѓани го поддржуваат Законот за заштита од пушењето. Според мајското истражување на институтот „Димитрија Чуповски“,дури три четвртини од граѓаните на Македонија го поддржуваат Законот. Во анкетата, од вкупно 1.100 испитаници, 832 или 75,6 отсто се изјасниле дека му даваат целосна поддршка на Законот. (А.С.)