Русија до 2020 со нов ракетен парк
Во наредните 12 години во целост ќе се обнови атомскиот потенцијал
Од нашиот дописник
Бранко Влаховиќ
МОСКВА - Русија планира во наредните 12 години во целост да го обнови својот стратегиски атомски потенцијал, изјави потпретседателот на владата, Сергеј Иванов, кој е задолжен за военоиндустриски комплекс. Покрај новите ракети, Русија до 2020 година целосно ќе ги замени своите сателити со многу помодерни и поефикасни. Во периодот од 2009 до 2011 година, армијата ќе добие 70 стратегиски атомски ракети и 30 ракетни комплекси „искандер“.
Поранешниот министер за одбрана, Сергеј Иванов, кој во руската влада сега го следи остварувањето на програмата за модернизација на вооружените сили, истакнува дека сега една од главните задачи е да се произведе доволен број сосема ново оружје кое ќе биде компјутеризирано, па затоа многумина го нарекуваат „паметно“. Пред неколку дена претседателот Дмитриј Медведев изјави дека за армиските програми нема да се спроведува рестрикција.
„Во создавањето високо технолошко вооружување ќе бидат вклучени многу области од науката и производството. Стотици компании ќе бидат ангажирани за создавање модерно оружје“, објасни Сергеј Иванов.
Не е никаква тајна дека Русија по распаѓањето на СССР, во времето на владеењето на Борис Елцин ги прекина сите програми за модернизација на вооружувањето и во армијата со години владееше хронична беспарица. Во таква ситуација Русија можеше да се потпре само на техниката што ја наследи од СССР. Нејзините генерали тврдат дека, за среќа, СССР создал можен ракетен потенцијал, а тоа е причината што никому не му падна на памет да ја нападне таа географски голема земја. Поранешниот американски државен секретар Медлин Олбрајт изјавуваше дека е „неправедн�� Русија да има такви рудни богатства“. Руските генерали со право се прашуваат: „Замислете што би направиле Олбрајт и нејзините истомисленици Русија да немаше ракети со атомски боеви глави“.
Рускиот потпретседател на владата, Сергеј Иванов, објаснува дека во создавањето на новото оружје ќе се користат материјали направени со помош на т.н. нанотехнологија. „Нашите произведувачи веќе направија материјали кои се поеластични и подобро ги поднесуваат разликите во температурата. Една од компаниите која ќе ги користи тие материјали ќе биде ’Сухој’ чии авиони се познати во светот. Значи, не се работи за научна фантастика, туку за реалност“, рече Сергеј Иванов.
Стратегиските атомски сили на Русија се основен фактор кој треба да ги „задржи и вразуми“ потенцијалните агресори, бидејќи ниту една земја не може да направи таков „атомски чадор“ кој би ги спречил сите атомски проектили на непријателите. Поради тоа, единствена ефикасна заштита е што противникот знае дека во случај на војна и тој би имал огромни жртви. Досега таа „рамнотежа на стравот“ е најефикасен начин да се спречат амбициозните генерали од намерата да тргнат во атомски судир. |
