Бизарен спор за една бизарна смрт
ОХРИД - Кога пред нецела година во Охрид беше убиен српскиот турист Дејан Новаковиќ, охридската локална самоуправа и градоначалникот Александар Петрески направија се' да му помогнат на семејството од трагично настраданиот млад белграѓанец. Градоначалникот беше лично на испраќањето на посмртните останки, го носеше портретот на настраданото момче, лично побара, а Советот на Охрид одобри 5.000 евра како прва помош на семејството на Новаковиќ. Граѓаните го поздравија тоа како чин на грижа и однос кон едно семејство што го изгубило најблискиот.
Една година потоа, градоначалникот вели дека „ниту свети СДСМ не може да го натера да ја доисплати ветената сума. „На семејството би му порачал да биде покоректно. Работите што ги договараме, а кои се интимни, да останат меѓу нас. Нема потреба да одат ниту во медиуми, ниту во СДСМ, ниту каде било. Со тоа што го прават, ме тераат да го сменам својот однос кон нив. Доколку не се коригираат во својот однос, можам да ја сменам одлуката и да се намали исплатата на средствата и да останат само со парите што ги добија. Треба да се однесуваат како што доликува, имаше трагичен настан. Не се дојдени на печалба“, вели Петрески.
Градоначалникот е непопустлив. За него, петте илјади евра не биле обврска, туку подарок за семејството. Тој е зачуден што на ваков начин, преку медиуми, се бара остатокот од средствата, кои, според договореното, требало да се исплатат на рати.
„Никаков притисок нема да влијае врз мојата одлука. Парите ќе ги добијат кога ќе го сменат својот однос. Во спротивно, ќе предложам на Совет да се смени одлуката и тие да останат без пари“, се заканува Петрески.
Мајката на убиениот српски турист Дејан Новаковиќ, Јулијана Зубовиќ, бара од локалната самоуправа на Охрид во целост да се исплати ветената сума за загубата на синот, кој во минатото лето во тепачка беше убиен пред охридската пошта. Обвинува дека градоначалникот повеќе нема слух за нивните барања. „Досега два пати се исплатени околу 3.500 евра. Сопругата на Дејан остана со три деца, не работи, а има постојани трошоци, меѓу другото, за патувањата на судењето. Се обраќаше повеќе пати за да го испочитуваат договореното. Имавме трошоци и за погребот и за пренесувањето на телото преку граница. Се надевам дека ќе ги дадат сите пари, но малку се неефикасни“, вели Јулијана Зубовиќ, мајка на убиениот српски турист. (В.М.) |
