Грција се подготвува за можен пораз во Хаг

Од нашиот дописник
Слободанка Јовановска


БРИСЕЛ - Грција се подготвува за евентуален пораз во Хаг во однос на тужбата на Македонија, односно за варијантата, ако не и' оди во прилог, да ја одбегне одлуката на Меѓународниот суд на правдата. Вака асоцираше прашањето што довчерашниот портпарол на грчката Влада, а сега европратеник, Јоргос Кумуцакос, му го постави на специјалниот претставник на ЕУ за Косово, Питер Фејт, кое не беше адресирано директно на Македонија, но ја имаше како поттекст.

Каква ќе биде одлуката на ЕУ ако Судот во Хаг реши дека признавањето на Косово не било според меѓународните закони и не е легитимно, праша Кумуцакос, спомнувајќи дека во моментов повеќе држави веќе имаат воспоставено односи со експротекторатот. Според Фејт, Хаг ќе излезе со мислење за независноста на Косово некаде кон средината на идната година, нагласувајќи дека тоа нема да биде пресуда туку толкување, бидејќи на тоа се заснова барањето на Белград. „Нагласувам дека станува збор за мислење на Судот, а не за обврзувачка одлука, што е важно за земјите што го признале Косово, но, сепак, сами ќе решат што потоа“, му одговори Фејт на Кумуцакос. Претходно тој, исто така, нагласи дека независноста на Косово е неповратна, па поентата беше дека, што и да реши Хаг, Брисел нема да ја менува позицијата.

За разлика од Белград, Македонија поднесе тужба и чека пресуда, но без оглед на тоа, неприфаќањето на ставот на Судот околу Косово, ако биде спротивен со тој на ЕУ, веројатно ќе отвори врата и за неприфаќање на одлуката за Македонија.

Односите меѓу Косово и Македонија, по политичките проблеми последните месеци, Фејт ги окарактеризира како многу позитивни, додавајќи дека се надева оти многу брзо ќе биде завршена демаркацијата на границата. Практично тој потврди дека има останати нерешени проблеми околу ова прашање, изјавувајќи дека се чекаат уште некои последни чекори што треба да бидат одобрени од владите во Скопје и во Приштина.

„Мислам дека сме речиси дојдени дотаму“, заклучи Фејт додавајќи дека според него демаркацијата, сепак, не е пречката што ги сопира дипломатските односи. „Не мислам дека тие две прашања се поврзани, но сметам дека демаркацијата треба да биде завршена како проблем сам за себе. Мислам дека тоа го сфатија и двете страни“, изјави Фејт за „Утрински весник“.