Насловна

Кој е третиот функционер што го уловија лустраторите

Комисијата за лустрација го чека „Драматург“ да се
врати од странство

Курирот од Комисијата за верификација на факти вчера неколку пати наишол на затворени врати во домот на познатиот режисер, за кој лустраторите откриле дека повеќе години соработувал со тајните служби под псевдонимот „Драматург“.

Од Комисијата за лустрација велат дека имаат информација дека режисерот е надвор од државата и дека в понеделник повторно ќе се обидат да му го достават решението, според кое, тој од 1976 година како соработник на службите, ги кодошел колегите од „високообразовните и културно-уметничките кругови“.

Томе Аџиев, претседател на Комисијата за лустрација, објаснува дека досието „Драматург“ било „откриено“ откако режисерот и поранешен директор на високообразовна институција, од позиција на бивш функционер, доставил изјава дека не соработувал со тајните служби. При проверката во Комисијата, како што ни потврди Аџиев, било утврдено дека тој прво бил следен од службите, но потоа почнал да соработува со нив.

Обврската поранешните функционери да се отчитаат дали соработувале со полицијата или со разузнавачките служби произлезе од измените на Законот за лустрација што беа донесени пред предвремените парламентарни избори по иницијатива на владејачките ВМРО-ДПМНЕ и ДУИ. Со тие измени енормно се проширија категориите на лица што се под опсервација, така што, покрај актуелните функционери, изјави треба да поднесат и поранешни носители на функции, а на лустрација подлежат и партиите, медиумите, верските заедници, невладиниот сектор. Се прошири и периодот што се проверува, почнувајќи од 1944 година досега.

Законот забранува да се објавуваат имињата на лицата за кои ќе се утврди дека соработувале со службите, но од информациите што протекоа, јасно се наѕира дека станува збор за личност блиска на опозицијата, каков што беше случајот и со претходниот уловен кодош, советник во град Скопје, Слободан Угриновски, кој сам си го откри идентитетот.

Пред тоа, за соработник на службите беше прогласен поранешниот претседател на Уставен суд, Трендафил Ивановски, кој ги помина сите инстанции на жалба против решението на лустраторите, а сега неговиот случај е во Судот во Стразбур.

Најновиот случај, „режисерот“, има право да се произнесе по решението на Комисијата за лустрација, а потоа може и по судски пат да ја обжали одлуката на лустраторите.

Аџиев вели дека во законски предвидениот рок во Комисијата за лустрација стигнале околу шест илјади изјави на поранешни функционери. Процените, пак, се дека бројката на некогашни функционери што треба да се лустрираат е многу поголема, дури и се оперира со бројка од околу 300 илјади. Досега, според Аџиев, се прегледани околу 300 изјави, а другите се' уште се проверуваат, врз основа на информациите од УБК, АР, военото разузнавање и Државниот архив. (А.М.М.)