Лиценцата на А1 зависи од судската одлука
Горан Адамовски
Советот за радиодифузија (СРД) ќе ја чека разврската околу стечајната постапка за А1, по што ќе се произнесе дали ќе и' ја одземе дозволата за работа на телевизијата на Велија Рамковски. Доколку судот донесе одлука за стечај, односно ликвидација на субјектот, тогаш Советот по автоматизам ќе му ја одземе лиценцата, бидејќи „правниот субјект што ја поседува дозволата за работа е ликвидиран“.
„Но, доколку стечајната постапка заврши со предлог за реорганизација, односно управителот добие можност да го реорганизира субјектот, тогаш нема причина да ја поништиме дозволата за работа“, изјави вчера претседателот на СРД, Зоран Стефаноски, кој објасни дека ставот на СРД бил по консултација со нивните правни служби.
Иако најавен, „случајот со А1“ не беше дневна точка на вчерашната седница на СРД, прва по летните одмори. Датумот на седницата несреќно се совпадна да биде четири дена откако Собранието ги изгласа измените на Законот за радиодифузна дејност, со кој е предвидено зголемување на членовите на Советот од 9 на 15. Обидите на власта да го оправдаат ваквиот потег со цел да го зголеми квалитетот на работа на Советот за досегашните членови е алиби да се стави контрола врз ова регулаторно тело.
Според СРД, иако Законот е веќе донесен и нема што да се направи, најголемиот дел од нив (шестмина беа „за“, двајца п��отив и еден воздржан), сепак, сакаат да изразат протест и револт зошто измените беа донесени во скратена постапка, по само четири дена и без да се консултира Советот.
„Немаше составено ни влада, а прво што беше направено е измена на Законот. Законот го изгласаа на 18 јули во 18,39 часот, набргу беше потпишан од претседателот на државата, а истиот ден веќе објавен во ’Службен весник’“, зборуваше Стефаноски.
Членовите констатираа дека немало потреба за зголемување на бројот бидејќи тие солидно си ја вршеле задачата, а извештајот за нивната работа едногласно минал во Собранието. Освен тоа, стравуваат дека сега ќе биде доведена во опасност неутралноста на Советот, укажуваа дека при избирањето на новите членови, нема да биде запазена процедурата, а посебен проблем се финансиите.
„Собранието смета дека зголемениот број членови нема да се одрази врз буџетот, но забораваат дека СРД се финансира со четири отсто од радиодифузната такса, како и од плаќањето лиценци, а не од буџетот“, зборуваше заменикот Милаим Фетаи.
Двајцата новинари што се членови на СРД констатираа дека ќе се минимализира влијанието на новинарите во Советот, но не беа децидни дали ќе се повлечат оттаму како што најави Здружението на новинари.
„Оставките останува како опција и секогаш може да ја искористиме“, смета Столе Наумов.
|
