Поглед

Туризам без алтернатива

Миркица Поповиќ

Со идејата за развој на алтернативен туризам си играме веќе неколку години. Да имавме како држава профил на „Фејсбук“, статусот за алтернативен туризам ќе ни беше „комплицирано е“. Велосипедски и пешачки тури по планините, јавање коњи и уживање во традиционалната кујна на Галичник, Маврово и Лазарополе, прошетки по водопадите, посети на Куклици и Кокино, црковен туризам, параглајдерски авантури во Крушево и на Попова Шапка. Идеите се вртат, но се' уште само во глава или на маса. Суровиот материјал за развој на алтернативен туризам постои, само уште да се одлучиме дека сакаме „сериозна врска“ и да си направиме стратегија.

Не е потребно којзнае што да се смислува. За почеток, сите не' советуваат да се посветиме на задоволување на основните стандарди - чиста природа, понуда на соодветни сместувачки капацитети со чисти тоалети, топла вода за туширање, добра хигиена, ознаки на патиштата, средени комуналии и, главно, подобрување на патната инфраструктура. Неколкуте координатори на успешни проекти за алтернативен туризам, кои минатата недела беа во посета на Македонија, велат нема потреба да измислуваме топла вода или веднаш да се расфрламе со идеи за мегаломански проекти. Слободно може да се искористи веќе смислен проект и да се приспособи за нашата средина. Нам ни останува да си ја смислиме својата егзотична приказна со која ќе ги привлечеме туристите, да подготвиме проект и да побараме дел од европските пари кои и онака се распределени за нас и нашите соседи преку инструментот за п��етпристапна помош ИПА за државите кандидати за членство во ЕУ.

Едноставно е. Треба да се стави крај за „комплицирано е“ и да се смени статусот на државава во „во сериозна врска со“ алтернативниот туризам.