За српскиот патријарх Иринеј, МПЦ е минлива епизода!

Од врвот на нашата Црква не сакаа да ги коментираат најновите провокации од поглаварот на СПЦ

Билјана Јовановска


Патријархот на Српската православна црква, Иринеј, откако е седнат на тронот, во континуитет дава изјави од кои е кристално јасно дека тој ни оддалеку не размислува да го затвори отворениот црковен спор со нашата Црква. А токму ова, како приоритет, го побара од него и вселенскиот патријарх Вартоломеј на последното испраќање на покојниот Павле, кој имаше желба за надминување на спорот, но не успеа да му се спротивстави на силното радикално крило во српскиот епископат.

Во последното интервју за агенцијата Бета, Иринеј Буловиќ, меѓу другото, изјавил дека обидите за создавање православни цркви во Црна Гора, порано во Македонија и сега во Хрватска се епизоди од минлив карактер. „Секаде имало предавници. Случајот со Македонија е малку постар и посериозен, но ќе се најде пат и желба да се надмине. Сега тоа е потешко отколку пред неколку години, но се надевам дека тоа ќе биде само епизода“, изјави српскиот патријарх.

Дебарско-кичевскиот митрополит Тимотеј, портпарол на Синодот на МПЦ, вчера не сакаше да даде каков било коментар, со објаснување дека ваквите искази на г. Иринеј „се надвор од секаква реалност“.

Иако пред изборот за наследник на г. Павле, тогашниот нишки епископ, се сметаше за умерен, уште со првата изјава испрати јасен сигнал дека е илузорно Македонската православна црква да се надева на скорешно решавање на проблемот. За волја на вистината, експлицитно, вакво нешто не кажал, ама она што го соопштува меѓу редови ни оддалеку не оди во полза ни на седнување на заедничка маса за продолжување на дијалогот, а не за негово надминување. Новоизбраниот 80-годишен поглавар на СПЦ уште во старт навести ново непријатно поглавје во меѓуцрковните преговори и рече: „Ние сме најблиски едни со други. Заеднички ни се историјата и културата, јазикот, исто така, е разбирлив и на едните и на другите. Тоа што досега се случуваше не е нормално и ние секогаш настојувавме да го надмине тој проблем. Тие не го сфатија ова доволно. Сега го сфаќаат, но сега има еден нов проблем. Постои официјална Македонска црква, која тие не ја признаваат, а која ја признаваат сите други цркви. Сега се потребни напори и од нивна страна заемно да го решат проблемот“.

Со други зборови, патријархот побара од нас да му го решиме „проблемот Вранишковски“ што е невозможно, бидејќи ставот на МПЦ е познат: „ Може да зборуваме за Јован, ама не и со Јован“.

Најновата изјава на Иринеј не �� ништо друго, туку најобична провокација, зашто се обиде во ист кош да ја стави Македонската православна црква во чија реалност самиот во повеќе наврати се уверил и Црногорската, која постои на хартија, но нема ниту црковен живот, ниту клер, ниту цркви и манастири. Иако двете цркви се разликуваат како ден и ноќ, г. Иринеј ни стави знак на равенство, што говори дека намерно замижува пред фактите.

Синодот на МПЦ непосредно по изборот на новиот патријарх, испрати писмо во кое побара од Црквата на нашиот северен сосед седнување на заедничка маса и решавање на отворените прашања. Покажаа дека се подготвени за разговори, меѓутоа, од Патријаршискиот двор во Белград, наместо официјален одговор, стасуваат пораки, кои се надвор од здравиот разум. За каква „епизода“ говори г. Иринеј кога Македонската православна црква има историски континуитет или, како што велат каноните, апостолско преемство. Пред точно 52 години тогашниот српски патријарх Герман ги ракоположи првите македонски архијереи на возобновената Охридска архиепископија - Македонската православна црква и писмено соопшти дека со тој чин на територијата на Република Македонија повеќе не важи Уставот на СПЦ.