Почна академската година во Кавадарци

КАВАДАРЦИ - „Еден од сегментите на образованието во кој видовме шанса за промени беше зголемувањето на високообразовните институции и дисперзираните студии, со што би го приближиле високото образование до младите. Во оваа насока беше и проектот за реализација на повеќе од 30 години старата идеја за отворање нов државен универзитет во Источна Македонија“. Ова го рече премиерот Никола Груевски вчера во Кавадарци при отворањето на новите простории за дисперзирани студии на Земјоделскиот факултет од насоката Енологија и од Факултетот за природни и технички науки од насоката Компјутерски дизајн при Универзитетот „Гоце Делчев“ од Штип.

Премиерот ги посети приватното претпријатие „Кожувчанка“ и „Фени индустри“. Тој нагласи дека раководството на „Фени“ го информирало оти состојбите во нивниот сектор, по силниот удар од светската економска криза се подобруваат. „Цената на берзите на никелот расте, а особено ме радува тоа што се враќаат работниците на работа“, истакна Груевски. (А.Д.)