Идната недела стартува изградбата на надземниот премин на Бит-пазар

Најпрвин ќе се копаат темелите од страна на грнчарската продавница, спроти Здравствениот дом

Претставници на фабриката „Карпош“ и на Општина Чаир вчера официјално се договориле од 15 септември да започнат градежните зафати за изградба на пешачкиот премин на Бит пазар. На средбата било констатирано дека испитувањето на земјиштето веќе е завршено и има подземен катастар за поставеноста на електричните кабли и фекални и водоводни цевки.

Договорено било темелите на цилиндричниот пешачки премин да се ископаат најпрвин од страна на грнчарската продавница, спроти Здравствен дом Бит-пазар. Оценето било дека токму таа страна е покритична, бидејќи според подземниот катастар од таму минувале повеќе цевки и електрични кабли. Надлежните од Општина Чаир велат дека најдобро е да почнат ископувањата за прецизно да се види дали може да се оди со отстапки на темелите на надвозникот за половина до еден метар, или можеби ќе треба да се поместуваат инсталации.

Градежните зафати треба да завршат до крајот на октомври, кога пешачкиот премин ќе биде подготвен за употреба. Преминот ќе го одржува „Акцент медија“, а за возврат на него ќе користи рекламен простор.

Од Чаир нагласуваат дека покрај скалите, преминот ќе има лифтови и тоа и од страната на аптеката „Зегин“ и од кај грнчарската работилница, а со нив ќе управуваат вработени лица. Тие ќе им помагаат на старите и на лицата со инвалидски колички да се искачат на преминот. Сегашниот земен премин комплетно ќе биде затворен со жардиниери и метална ограда, со цел целиот пешачки сообраќај да се пренасочи на надземниот премин, кој ќе биде изграден од бетон и плексиглас. (Сн.К.)