Фудбалски вести
Хуанде Рамос дебитира со победа
Фудбалерите на Реал Мадрид го потврдија пласманот во осминафиналето од Лигата на шампионите, откако на свој терен го совладаа Зенит со 3:0 и на својот нов тренер Хуанде Рамос му подарија победа во дебитантскиот меч на клупата на „кралевите“.
Иако, Реал М. викендов го очекува големото дерби со Барселона и, иако, овој дуел со Зенит не носеше никакв битна одлука, Рамос не калкулираше. Практично излезе со најсилниот состав што во моментов го има. Стрелци беа Раул во 25, Робен во 50 и повторно Раул во 57 минута, за повторно преземање на водечката улога на вечната листа на стрелците. Сега Раул има 64 гола во најреномираното европско натпреварување, а Инзаги од Милан 63.
Мадриѓаните одлично го одиграа целиот натпревар. Постојано ја тероризираа одбраната на Зенит и победата можеше да биде уште поубедлива. „Нашите навивачи вечерва можеа да видат многу позитивни нешта. Покрај тоа што бевме добри во нападот, не примивме ниту еден гол. Играчите се способни да ги завртат работите во своја корист, исто како и фановите и бордот. Сите заедно сакаат да се докажат што е можно побргу“, изјави задоволниот Рамос, кој седна на клупата на Реал М. на местото на Бернд Шустер.
Реал М. и со оваа победа остана втор во групата зад Јувентус, кој одигра без голови на свој терен со Бате Борисов. Италијанците имаат исто 12 бода, како и Реал М., но и подобра гол-разлика.
Во групата Г Порто успеа да го совлада Арсенал со 2:0, одмаздувајќи се така за поразот од 0:4 во Лондон. Арсен Венгер на овој меч експериментираше со неколку млади фудбалери и заслужено доби шлаканица. „Нашата тактика беше одлична. Бевме страшно силни, особено во вториот дел. Не знам дали воопшто имаа шанса. Оваа игра ни дава голема самодоверба за наредната фаза“, изјави тренерот на Порто Хесуалдо Фереира.
Резултати
Група Е: Манчестер јунајтед - Алборг 2:2, Селтик - Вилјареал 2:0
Табела: Јунајтед 10, Вилјарел 9, Алборг 6, Селтик 5
Група Ф: Стеауа - Фиорентина 0:1, Лион - Баерн 2:3
Табела: Баерн 14, Лион 11, Фиорентина 6, Стеауа 1
Група Г: Порто - Арсенал 2:0, Динамо Киев - Фенербахче 1:0
Табела: Порто 12, Арсенал 11, Динамо Киев 8, Фенербахче 2
Група Х: Јувентус - Бате 0:0, Реал М. - Зенит 3:0
Табела: Јувентус 12, Реал М. 12, Зенит 5, Бате 3
Како победници на групите во осминафиналето се пласираа: Рома, Панатинаикос, Барселона, Ливерпул, Манчестер јунајтед, Баерн, Порто и Јувентус, а како второпласирани: Челзи, Интер, Спортинг, Атлетико Мадрид, Вилјареал, Лион, Арсенал и Реал Мадрид.
Освојувачите на третото место се селат во Купот на УЕФА: Вердер, Бордо, Марсеј, Алборг, Зенит, Шахтјор, Фиорентина, Динамо Киев.
Тијаго Силва доаѓа во Милан
„Росонерите“ постигнаа усмен договор со Бразилецот од Флуминенсе Тијаго Силва, кој од следното лето ќе стане нов член на Милан. Карло Анчелоти сакаше да го доведе овој фудбалер уште ова лето, но трансферот беше одложен поради тоа што Милан ја имаше исполнето квотата за играчи надвор од Европската унија. Италијанските медиуми пишуваат дека за засилувањето во одбраната Милан ќе плати 10 милиони евра.
Сидорф: Италијанците не се расисти, туку будали
Играчот од средниот ред на Милан изјави дека Италија не е расистичка земја, но дека има проблем со ксенофобијата.
„Италија е убава земја и повеќето луѓе навистина се пријатни. Што повеќе го споменувате расизмот толку повеќе го рекламирате. Сметам дека тука постои културолошка глупост бидејќи луѓето ги напаѓаат припадниците на малцинствата од други земји. Италија исто така има сиромашни и бездомници. Тоа не е расизам туку глупост“, изјави Холанѓанецот.
Топ-10 можни трансфери во јануари според „Дејли телеграф“
1. Кака (Милан - Манчестер Сити)
2. Буфон (Јувентус - Манчестер С.)
3. Зоран Тошиќ (Партизан - Манчестер јунајтед)
4. Јаја Туре (Барселона - Арсенал)
5. Јакинта (Јувентус - Арсенал)
6. Дарио Срна (Шахтјор - Тотенхем)
7. Андре Пјер Гигнак (Тулуз - Тотенхем)
8. Фернандо Кавенаги (Бордо - Ливерпул)
9. Рисе (Рома - Њукасл)
10. Лендон Донован (Л.А Галакси - Евертон)
Алекс сака да си оди од Челзи
Тренерот на Челзи, Луис Фелипе Сколари, остана шокиран откако Бразилецот Алекс му кажа отворено дека сака да си оди во зимскиот преоден рок. „Им кажав на сите дека сакам да го напуштам Челзи. Имам неколку опции за продолжување на кариерата, за кои ќе размислам сериозно“, изјави 26 годишниот дефанзивец, која сезонава настапи во 12 меча за Челзи. Наводно за него се заинтересирани Милан, Севилја и Панатинаикос. |
