Поглед

Ватерполо и веронаука

Александра М. Митевска

Се излажаа љубителите на спортот кои помислија дека викендов без пречки преку програмата на МТВ ќе можат да ги следат завршните натпревари од Европското првенство во ватерполо. На многумина вниманието, веројатно, им го одвлекувал телопот што со часови минуваше низ телевизорот, а со кој родителите на петтоодделенците се повикуваат да им овозможат на своите деца да учат веронаука. Пардон - етика на религии.

Кој тоа ги советува родителите каков избор да направат остана непознато, бидејќи никаде не пишуваше кој ја плаќа пропагандната порака. Ако некој воопшто платил за долгометражното користење на рекламниот простор на националната телевизија во ударен термин!?

Дали раководството на МТВ, чиј основач е Собранието, а која би требало да биде сервис на сите што плаќаат претплата, на своја рака решило да го популаризира проектот што ВМРО-ДПМНЕ го турка уште од доаѓањето на власт? ��ли, пак, станува збор за уште една од мноштвото владини реклами, иако никаде не беше назначено дека е во прашање платена политичка пропаганда? Единствено, беше наведено дека предметот што се рекламира е „своевидна замена за веронауката, откако Уставен суд донесе одлука за нејзино укинување“.

Сеедно, по читањето на топлите препораки, тешко е да се поверува дека има родител кој нема да му овозможи на своето дете да го изучува предметот што нуди „содржини што промовираат љубов и доверба, запознавање со вистинските вредности на религијата и кои учат што е добро, а што зло во животот“.

На човек, просто, да му стане жал што генерациите досега немале можност да ги совладаат овие лекции и што етика не учеле оние што сега толку упорно ја туркаат веронауката во училишните клупи. Човек да помисли дека ќе беше подобро да се укинеше Уставен суд, наместо да му се дозволи тој да ја укине веронауката.