Тодоров и Стојковски во четири очи

Билјана Јовановска


Министерот за образование Никола Тодоров и ректорот на Скопскиот универзитет, Велимир Стојковски, иако ненајавено, вчера имаа получасовна средба во Ректоратот. По ова, двајцата не беа расположени за изјави, а на прашањето дали го надминале актуелниот спор околу идејата за расцепкување на УКИМ, Тодоров само кусо одговори: „Разговаравме“.

Пред средбата, прашан за жешката тема што наиде на исклучителен отпор кај универзитетската јавност, министерот одговори: „Слободата за отворање прашања и за широка дебата за нив е основна карактеристика на едно демократско општество и обратно - неовозможувањето дебата и неотворање прашања од типот - некои прашања не заслужуваат одговор - е карактеристика на тоталитаризам и недемократско општество. Јас ги почитувам принципите на демократијата и среќен сум што можеме отворено да дебатираме за сите прашања во Македонија како една висока демократска придобивка на нашето општество и на нашата демократија“.

Ректорот Стојковски, пак, рече дека тој секогаш е отворен за средби, за консултации, за разговори, за дискусии: „Кога министерот ќе биде слободен и ќе има време, вратите на Универзитетот се отворени. Но, и да се видиме и да разговараме, јас како ректор немам мандат да ги менувам одлуките на Ректорската управа и на Сенатот, кои се едногласни“.

Што било разговарано во ректорскиот кабинет, засега е тајна.

Но, Универзитетот „Св. Кирил и Методиј“ цврсто останува на ставот дека идејата за негово раситнување е штетна и е во спротивност со европските трендови во оваа област. Неофицијално дознаваме дека деновиве се вршат интензивни разговори и притисоци на одделни декани и видни универзитетски професори за прифаќање на новата организациска поставеност. Дури, се тврди, во неформални разговори пулсот на челни луѓе на атрактивни факултети го испитувал и директорот на Државниот просветен инспекторат, Џорџе Арсов. Бидејќи се работи за тема на која Универзитетот е исклучително чувствителен, професорите го сметаат ова како своевиден индиректен притисок и испитување на евентуалната подготвеност за отстапки. Главниот инспектор се интересирал како се гледа на иницијативата за трансформација на најстариот државен Универзитет за кој власта цени дека е обемен и нефункционален, па оттаму треба да се раситни на пет помали универзитети. Дознаваме, на Арсов му било речено дека професорите не ја прифаќаат идејата за растурање на УКИМ, а доколку министерот чувствува потреба за реформи, таа задача треба да му ја препушти на Универзитетот. Претходно, серија разговори со челните луѓе на неколку факултети остварил и министерот Тодоров.