СДСМ напаѓа и со метли: „Госпоѓо министерке, каде се па-ри-те?“

Театрална расправа за интерпелацијата против Елизабета Канческа-Милевска

Светлана Унковска

Немаше кој да ја одбрани министерката за култура Елизабета Канческа-Милевска на вчерашната расправа во Собранието за интерпелацијата против неа.

Повеќето од фотелјите на пратениците од мнозинството беа празни, а во првите две ударни редици немаше речиси никој. На силните напади од опозицискиот СДСМ, со бледи и неуверливи одговори излегуваа пратеничките од последните редови, кои досега ретко се експонирале.

Дури и самата министерка оставаше впечаток дека на моменти се губи во говорењето. Во набрзина прочитаното образложение, таа не изложи ниту еден поцврст контраргумент на обвинувањата на опозицијата за исчезнувањето на тендерската документација за „Скопје 2014“.

Сепак, случајот „Патриотска метла“ беше доволно инспиративен за опозицијата, која на вчерашната седница дојде вооружена со метли. На тоа нервозно реагираше претседателот на Собранието, Трајко Вељаноски, порачувајќи им на опозиционерите прво да го изметат сопствениот двор или да зачистат пред парламентот.

„Надвор не е изметено, може да одите да зачистите“, забележа Вељаноски. Но, тоа не ги поколеба опозициските пратеници, кои на секое излегување на собраниската говорница ја носеа со себе и метлата, со која мавтаа на секое споменување на аферата „Патриотска метла“. И додека пратениците од власта аплаудираа на крајот од обраќањето на Канческа-Милевска, опозицијата мавташе со метли. Тие бараа министерката сама да си замине или да биде разрешена.

„Македонија е претворена во оаза на криминал, станавме земја на незаконското работење на Груевски и фамилијата, но министерката Канческа ја премина секоја мерка. Исчезнувањето и уништувањето на тендерската документација е мегаафера со перење пари, а министерката е на врвот на пералницата.

Таа нема никаков морален ниту каков било легитимитет да ја извршува својата функција и затоа разрешете ја“, порача Игор Ивановски од СДСМ, кој во ноември ја отвори аферата со исчезнатата тендерска документација.

Милевска, пак, набројуваше што се' е сработено во нејзиниот ресор. Спомна дека во Битола го издаваат Центарот за култура, дека се вработени 480 лица во културата, дека платите се зголемиле за 60 проценти. На крајот таа кажа и дека МВР не нашло криминал во случајот со тендерската документација.

„Од МВР јавно кажаа дека недостига само дел од документацијата од посочените 14 предмети и ги потврдија ставовите на Министерството за култура дека не е исчезната финансиска документација и финансиски договори со милионски суми. Господинот Ивановски бесправно ја манипулира македонската јавност за исчезната документација од 20 милиони евра“ рече Милевска.

Реагираше Јани Макрадули од СДСМ: „Госпоѓо министерке, каде се па-ри-те, ќе кажам во слогови за полесно да разберете. Никој не ви дозволил да земате дополнителен хонорар од 40 илјади денари секој месец“.