Дивите градби ќе станат легални

Дивоградбите конечно „влегуваат“ во собраниска процедура откако завчера Владата даде зелено светло за Предлог-законот за третман на бесправно изградени објекти. Во законски рамки ќе бидат ставени само дивоизградените објекти што претставуваат градежна и функционална целина со комплетно изведени градежни и инсталатерски работи. Бесправната градба треба да исполнува соодветни стандарди за статика, за заштита на здравјето на луѓето, за заштита од пожар и на животната средина.

Министерството за транспорт ќе ја спроведува постапката за легализација на градбите од значење за државата, а општините за градбите со намена производство, дистрибуција, сервиси и домување во станбени куќи. За да се легализира еден објект, треба да се поднесе барање до надлежниот орган во рок од шест месеци од денот на стапување во сила на законот, по што специјална комисија ќе врши идентификација на бесправните градби. Надлежниот орган треба во рок од три месеци од поднесување на барањето да утврди дали се исполнети условите за издавање урбанистичка согласност, а потоа општината за пет работни дена да изготви пресметка за надомест со што би се утврдил правниот статус на објектот. Сопственикот на градбата ќе може да го плати надоместокот во рок не подолг од шест години.

Висината на надоместот ќе зависи од намената на објектот. За станбените куќи надоместокот изнесува 0,5 проценти од вкупниот годишен приход на членовите на семејството остварен во претходната година и помножен со квадратите изградена површина, додека за производните објекти и сервисите е ист со висината на надоместокот за уредување градежно земјиште.

Сопствениците на бесправните градби што ќе добијат правен статус, а се изградени на државно земјиште ќе треба или да го откупат земјиштето во рок од три месеци од легализацијата на објектот или да склучат договор за долготраен закуп. (Б.А.)