Моратинос чека да се реши името

Македонија ја чекала фантастична иднина ако го реши спорот

Слободанка Јовановска

Компромис за фантастична иднина - го нарече шпанскиот шеф на дипломатијата и претседавач со ЕУ, Мигуел Анхел Моратинос, евентуалното решение за спорот околу името со Грција, што ќе овозможи почнување преговори за членство со Европската унија.

Дојден со намера да влее оптимизам и да ја охрабри Владата да ја донесе финалната одлука, Моратинос ги стави во игра сите аргументи - од иднината на нашите деца, финансиската помош што би ја добила Македонија, привилегираниот статус во однос на другите балкански земји во ЕУ и улогата на земја-модел во регионот. Во тој стил Моратинос прес-конференцијата ја почна спектакуларно.

„Дојден сум да ви најавам една добра вест - дека за време на шпанското претседателство Македонија би можела да добие датум за преговори со ЕУ. За тоа се залагаме и убедени сме дека тоа ќе се случи. Целата наша енергија, одлучност и капацитет ќе ги вложиме за да го направиме тоа можно. Убедени сме дека тоа може да се случи пред крајот на шпанското претседателство“, рече Моратинос.

Ваквиот оптимизам, според него, се должи на подготовките на македонската власт и нејзиното „чувство за иднината“, што го увериле дека 2010 година ќе биде добра за нас и за евроинтеграцијата во ЕУ и во НАТО.

Дека зад сето ова стои очекувањето Македонија и Грција сами да најдат решение за спорот околу името, Моратинос потврди со изјавата дека шпанското претседателство може само да креира атмосфера на ургентност и да направи финален притисок, а решението им останува на Атина и на Скопје. Сепак, него го охрабриле заложбите на македонската и на новата грчка влада, иако се покажа дека тој многу повеќе и' верува на грчката, отколку на македонската страна во спорот за името.

„Од грчката влада имаме целосна поддршка во напорите да дојдеме до одлуката за преговори. Во тесни контакти сме со Папандреу и тој не' увери дека е подготвен да направи дополнителни напори за време на нашето претседателствување. А, јас им верувам на нашите пријатели“, изјави Моратинос. Според негова оценка, решението нема да биде перфектно ниту за Грција ниту за Македонија и ќе биде компромис, но компромис за фантастична иднина што ќе отвори пат за вистински рај во нашата држава.

„Не сакаме да губиме повеќе време. Потребна ни е вашата земја во ЕУ и вам ви е потребна Унијата. Шпанското претседателство е решено да ви даде добра вест. Дајте да ја надминеме оваа ситуацијата“, повика тој истовремено со апел да не и' се создаваат тешкотии на Владата, туку да и' с�� даде поддршка да ја донесе тешката одлука.

„Главен, суштински и основен интерес на вашата земја е да влезе во Унијата. И сите ние ќе бидеме во добивка од вашиот модел на интеркултурна толеранција и комуницирање меѓу различни заедници, што е богатство за ЕУ. Затоа ЕК ќе си ја заврши својата работа за што е можно поголемо забрзување на преговорите“, рече Моратинос.

На забелешките на парламентарците дека притисокот е само врз Македонија и оти грчката блокада нема оправдување, Моратинос одговори дека е точно оти Македонија направи огромни напори, дека е точно, исто така, оти има апсолутно право да биде членка на ЕУ, но точно е и тоа дека има проблем што мора да го реши.

На прес-конференцијата Моратинос беше со министерот Антонио Милошоски, при што заеднички оценија дека билатералните односи меѓу двете земји се „перфектни“, особено што нашиот шеф на дипломатијата петпати бил во Мадрид, а шпанскиот службувал во регионот и многупати ја посетувал Македонија, па знае и српски јазик.

На новинарско прашање во врска со лицитирањето на Грција за името „Северна Македонија“, Милошоски рече дека се потребни директни и суштински разговори, место давање изјави за домашна или за меѓународна употреба.

„На Македонија и' е потребен успехот на ЕУ и на шпанското претседателство, а истовремено и на ЕУ многу добро ќе и' дојде успехот на Македонија како случај за себе, но и како позитивен пример во регионот“, посочи Милошоски. (С.Ј.)