Антикорупциска го исчисти Наумовски

Комисионерите не најдоа судир на интереси во вработувањето на вицепремиерот на Правниот факултет

Катица Чангова

Антикорупциската комисија го исчисти Васко Наумовски. Нема судир на интереси во случајот со вработување на вицепремиерот, кој е избран за доцент на применети политички науки на Правниот факултет „Јустинијан Први“ во Скопје, соопшти Државната комисија за спречување на корупцијата.

На првата конференција за медиуми откако за претседател е избран Илми Селами, антикорупционерите, сепак, признаа дека овој случај ќе фрли сенка врз работењето на потпретседателот на Владата. Но, веднаш се оградија, велејќи дека тоа, сепак, е одговорност на Васко Наумовски.

Сосема поинаков став за истото прашање вчера презентираше „Транспарентност-Македонија“, обвинувајќи дека вработувањето на вицепремиерот Наумовски е коруптивно.
Според невладината организација, ова спаѓало во таканаречената трговија со влијание, кога функционери користат прикриени форми на влијание. Притоа, оценија дека во оваа корупциска афера „притисокот е направен дрско и отворено“. Вицепремиерот за евроинтеграции Наумовски, веројатно, користејќи ја својата политичка функција, си издејствувал место наставник на Правниот факултет, а не побарал мислење од Државната комисија за спречување на корупцијата, велат во „Транспарентност Македонија“. Оттаму сметаат дека не станува збор за изолиран инцидент, туку за сериозен системски политички проблем.

Извештајот на „Транспарентност-Македонија“ е комплетен производ на партискиот штаб на СДСМ, оцени вчера во реакцијата ВМРО-ДПМНЕ, нарекувајќи ја невладината организација партиска испостава на СДСМ.

Со три аргументи вчера Антикорупциската комисија го бранеше ставот дека нема конфликт на интереси кај Васко Наумовски. Првиот е дека вицепремиерот нема засновано работен однос на Факултетот, со што е избегната евентуалната ситуација на неспојливост на функции. Вториот дека Наумовски не е работно ангажиран и не остварува никакви дополнителни примања, а третиот аргумент е дека на јавно распишаниот конкурс се јавил само еден кандидат, со што нема сомневање дека по пат на евентуални влијанија, придонел да биде избран од Наставно-научниот совет на Правниот факултет.

„Во врска со судирот на интереси, имавме еден прашалник, во кој се вели дека избраните и именуваните функционери во јавното дејство секогаш, покрај другите прашања, треба да си постават прашање како јавноста ќе гледа на секое нивно следно дејство што ќе го сторат“, изјави претседателот на ДКСК, Илми Селами. Според него, доколку во наредниот период вицепремиерот заснова работен однос на Факултетот, тогаш фактичката состојба ќе се промени и во тој случај може да се јави судир на интереси. „Ние случајот ќе го следиме и натаму“, вети Селами. Тој појасни дека тоа што на Правниот факултет е избран доцент што се' уште не држи настава, е одлука на Наставно-научниот совет и Деканатот на Факултетот и дека тоа е нивна одговорност.

Селами потенцира дека предметот „Наумовски“ е нивна иницијатива, а дека одлучувале по јавно изнесени наоди во медиумите за евентуална состојба на судир на интереси. Наставно-научниот совет, по предлогот на Рецензенската комисија на 24 март годинава со мнозинство гласови донел одлука за избор на Наумовски во наставно-научно звање доцент на научната област применети политички науки, што треба да биде основ за засновање работен однос. Работен однос не бил заснован, бидејќи на 30 март деканот на Правниот факултет донел решение со кое на Наумовски му се става во мирување ангажманот како доцент, во периодот додека тој е на функцијата потпретседател во Владата, поради неспојливост за вршење други функции или професии.

Разгледувајќи поднесена претставка, ДКСК заклучила да поведе иницијатива до Јавното обвинителство за кривично гонење против две лица вработени во Секторот за сообраќај во градот Скопје, поради основано сомневање за кривични дела „злоупотреба на службена положба и овластување“ и „несовесно постапување во службата“.

Ѓорги Тодоров, вработен во администрацијата на град Скопје како советник за планирање и развој на сообраќајот, одобрувал проекти што претходно самиот ги изготвувал преку сопствената фирма „Спектрум инженеринг“ ДООЕЛ Скопје. Јован Христовски, непосредно претпоставен на Тодоров, во својство на раководител на Сектор за сообраќај ставал потписи на дописите со кои градот ги доставувал проектите до МВР, барајќи согласност.